Kumin August thlengin cheng vbch 1792 hu drugs man tawh

Kuminah August thleng khan Mizoram Police leh Excise & Narcotics department chuan ruihhlo cheng vaibelchhe 1797 hu an man tawh a, hemi kaihhnawihah hian mi 870 man an ni.
State Level NCORD (Narco Coordination Centre) thutkhawm tum 8-na chu an chairman, chief secretary Dr Renu Sharma hoin Nilaini khan neih a ni a. Chairman chuan ruihhlo leh a kaihhnawih do kawnga enforcement agency-te hmalakna fakawm a tih thu a sawi a. Ruihhlo dotute chu tha thlah loa tang mar reng turin a chah. DC leh SP te chu ruihhlo do kawnga lungrual taka hma lak a nih theih nan leh a sawt zawk nan, tawnhriat leh thu pawimawh inhrilhhre tawn zung zung turin an district-ah theuh NCORD thutkhawm thla khata vawi khat tal nei turin a chah.
DGP Anil Shukla chuan ruihhlo avanga case ziahluhte chhuichhuah zung zung a nih theih nan law enforcement agency-te tanrual a pawimawh tih a sawi a. Ruihhlo mai nilo zu, vaihhlo leh a kaihhnawih hrang hrang pawh ngaihthah theih a nih loh thu a sawi. Mizoramah ruihhlo kaihhnawih case a pun zel avangin Narcotics Control Bureau office din a tul tawh takzet tih a sawi a ni.
Ruihhlo leh a kaihhnawih ruihhlo hrang hrang do kawnga NCB, Mizoram Police, Excise & Narcotics, Assam Rifles leh Social Welfare department hmalakna thlirlet niin, hmalak chhunzawm zel dan tur sawiho a ni.
Anti-Narcotics Task Force head, IGP (Intel) Lalbiakthanga Khiangte chuan Mizoram Police leh Excise & Narcotics department ten theihtawp an chhuah tih a sawi a. Kumin August thleng khan ruihhlo cheng vaibelchhe 1797.2 hu an man tawh a, hemi kaihhnawihah hian case 640 ziaklutin mi 870 an man tawh a ni.