Kuminah heroin kg.50 chuang man tawh

Kuminah June thla tir lam thleng khan Mizoramah heroin kg. 50 chuang man a ni tawh a. Ruihhlo (drugs) tih remna pakhat atan sawrkar chuan khaw tinah Task Force din a tum.
‘Working Committee on Ruihhlo Do’ chu an chairman, Excise & Narcotics minister Er Lalrinawma hoin an thukhawm a. A department chan tho Social Welfare hotute, Excise & Narcotics hotute, Mizoram Police, Mizoram State AIDS Control Society, Health & Family Welfare hotute bakah pawl aiawh sawmbikte an tel.
Report-a tarlan danin, Mizoram Police chuan kumin January atanga May thla thleng khan heroin kg 26.521 an man tawh a, kum hmasa chhunga an man zat kg 49.367 nena khaikhinin kumi hian an man tam zawk. Damdawi ruih theih Methamphetamine siamna atana hman Pseudoephedrine kg. 210.72 man tawhin, nikum khan kg 29.80 an man. Kumin chhung hian Methamphetamine kg 25.38 an man tawh bawk.
Excise & Narcotics Department chuan kumin January atanga June kal mek thlengin heroin kg 27.751 an man tawh a, ganga kg 15.305 man tawhin Methamphatamine kg 4.056 an man tawh.
Central YMA hnuaia ruihhlo dotu Central Anti Drugs Squad pawhin nikum September 9 atanga hma an lak thar atanga tun thlengin heroin hawng 1696 an man tawh a ni.
Thukhawm chuan Mizorama ruihhlo hluar zel dona tura Mizoram sawrkarin ‘Core Committee on Ruihhlo do’ a din hnena cheng vaibelchhe thum a pek hman dan leh hmalakna hrang hrang thlir hoin an hmachhawpte an ngaituah a. Drug demand reduction, supply reduction leh harm reduction chungchanga department leh NGO hrang hrangte hmalakna thlir ho a ni. Ruihhlo do kawngah chak zawka hma lak a nih theihna’n uar zawka do leh thawhhona tha neih a tul tih an sawi a. Khawpui bakah thingtlang lama ruihhlo hluar nasa lutuk chu a veiawm hle, tiin, hmun kilkhawr ber thlenga ruihhlo hluar ta chu nasa lehzuala inhrilhhriatna kalpui nise, an ti. Action plan zau zawk siam tha tiin, district tina khua zawng zawngah ruihhlo do tur Task Force din nise, an ti.