Sawrkar kumthar, 2023- 2024 atana Mizoram sawrkar sum ruahman chu cheng vaibelchhe 14209.95 a ni a, mipui nghawng chhiah lak thar a awm loa, SEDP family oriented atan cheng vaibelchhe 300 dah a ni.
-- Advertisement --
Thawhtanni khan Assembly House-ah finance changtu chief minister Zoramthanga chuan 2023- 2024 sawrkar sum ruahman dan a pharh a. Sum dah danah hman tura hmanral tura ruahman zat leh sum hmuh tur beisei zat a intluk tawk a, sum indaih lohna (deficit) tura beisei lawk a awm loh ang bawkin sum hman chuang bang (surplus) beisei tur a awm lo a ni.
Sum hmanna tur hlawm lian pahnih ruahmanah revenue expenditure – sawrkar hnathawk hlawh leh pension, sawrkar inrelbawlna hrang hrang, mipui nitin mamawh – tui, kawlphetha leh buhfai leina (subsidy) atante, health care leh state sawrkarin hmasawnna hnathawhnaa sawrkar laipui sum pek a lo doletna tur – state matching share atan leh thildang atan sum hman tur ruahman tam zawk, cheng vaibelchhe 11068.76 chu dah sa a ni a, hei hi sum hman tur ruahman zawng zawng atangin zaa 78.10 a ni.
Capital expenditure – mipui nghawng, state hmasawnna atana hnathawhna tur sum ruahman chu cheng vbch. 3141.19 a ni a, hei hi sum hmanna tura ruahman chhin atangin zaa 21.90 a ni.
Revenue leh capital section hnuaia sum hman tura ruahman hi cheng vbch. 14341.95 niin, hemi atang hian FCS&CA hnuaia buhfai leina man leh Printing & Stationery hnuaia stationery bungrua hralhna lut tura beisei zat vbch. 132 paihin, sum hman tura dah hi cheng vbch. 14209.95 a ni.
Sum hmuhna tura ruahmanah, state sawrkarin chhiah atanga hmuh tura beisei chu vbch. 1084.29 a ni a; chhiah ni lo, tui/ electric bill adt. ang chi atanga sawrkarin sum a hmuh tura beisei chu vbch. 896.99 niin, a vaiin state-in sum a hmuh tura beisei chu vbch. 1981.29 a ni. Chhiah ni lo, bill ang chia sawrkar sum hmuh tur hi kum kal mek (2022- 2023) aiin vbch. 60.57 in a sang zawk.
Sawrkar sum hmuhna tur liantham dang pakhat leh chu, sawrkar laipui nena chhiah lut insem atangin vbch. 5107.25 beisei a ni a. Centrally sponsored scheme sh vbch. 2670.42 leh externally aided projects ah vbch. 96.44 beisei a ni bawk.
Sawrkarin sum puk turin ruahmanna a neisa a, vbch. 2689.72 a ni. Scheme for Financial Assistance to States for Capital Investment (SASCI) hnuaiah kum 50 hnua a pung awm loa rulh tur vbch.200 te, market borrowing atangin vbch. 1200 leh NABARD loan vbch. 270 te chu a lian zual a ni.
Chief minister hian kum kal meka sum hman ruahman belhna, Supplementary Demands for Grants 2022-2023 cheng vaibelchhe 3265.69 chu a pharh nghal a ni.
Chief minister chuan health care atan hian an sawrkar tirhin vbch.50 an dah nghal a, Covid lengin a tihbuai tak avangin an dah chhunzawm thei mai loa, tunah hrileng a ziaawm tak avangin an dah leh ta tih a sawi a. State-in a ruahman sa bakah hian ADB atanga vbch.1000 an puk pawh health care atana hman tur a ni tih a sawi. “Kan sawrkar loh chhung khan dah belh a awm miah lo tih a enkawltuten min hrilh,” a ti.
Sum renchem thei ang berin an kal tih a sawi a. Loh theih loha hmanna tur – sawrkar hnathawk hlawh leh pension leh nitin mamawh leina atana sawrkarin sum a hman bak, tumdanga department tina sem darh den den ang chi kha an ti ta loa, mamawh bika an dahhran bak hi budget tak tak an kalpui a, department ten project an thehluh dan azir zelin hman leh sem a ni tih a sawi. Hemi atan hian department mai ni lo, pawnlam atanga project siam thiam te pawh hmang tangkai thiam turin a hrilh tih a sawi a ni.
Kum hmasa aia capital expenditure-a sum dah a tlem tak deuh chhan chu, PM-DeVINE a sum an hmuh ang kha a awm tak rih loh bakah CSS, NREGA, BADP ang chia sum hmuh chu a tlem deuh tak vek vang niin Finance hotute chuan an sawi a ni.
Chief minister chuan state sawrkarin sum tam zawk a thawh chhuah theihna turin policy decision khirhkhan zawkte pawh siam tura inbuatsaih chhoh a pawimawh dawn tih a sawi a. Central lamin state-a sum a pekte a pawhzim telh telh avangin capital investment atana sum thehchhuah tur ngaihtuah hi a pawimawh chho zel dawn tih a sawi a ni.
# Sum hmanna tura ruahman hrang hrang zingah, sawrkar flagship SEDP family oriented atan vbch 300 dah a ni a, hemi bak SEDP kaihhnawih hrang hrang danga vbch. 295 dah nen a vaiin vbch. 595 dah a ni.
# Health care scheme atan vbch. 50 dahin, he scheme-ah vek hian, The Mizoram Lotteries (Regulation) Rules 2019-in a phut angin mipui tana luan ve na pakhat atan lottery kalpui thar leh meka sum thawhchhuah atangin vbch 10 dah a ni a, health care ah hian a vaiin vbch.60 dah a ni.
# MLA local area development fund atan cheng vaibelchhe 60 ruahman a ni.
# Lunglei Municipal Council thar enkawlna atan cheng nuai 128 dah a ni.
# P&E department hnuaia eng chhit man mipuiin tlawm zawka kan chawi theih nan direct subsidy atan vbch. 157.90 dah a ni.