Kuthnathawktute dinhmun chawikan MASA kuta awm – Agriculture minister

Kuthnathawktute tana hnathawk an nih avangin kuthnathawktute dinhmun chawikan chu an kuta awm a ni tiin Agriculture minister PC Vanlalruata chuan Mizoram Agriculture Service Association (MASA) a chah.
MASA hian Ningani khan Aizawlah general conference vawi 9-na an hmang a. Hmanpui Agriculture minister chuan an pawl chu kuthnathawktute tana hna thawk an nih avangin kuthnathawktute dinhmun chawikan chu an kuta awm a ni tih pawm turin a chah a. Sawrkar tharin kuthnathawktute intodelhna lam a ngaipawimawh hle, tiin, MASA member-te pawh an thiamna leh theihna kuthnathawkte din chhuah nana thahnemngai taka hmang turin a fuih. Hemi ti hlawhtling tur hian central leh state atanga sum an dawn ang ang tangkai leh daihzai taka hman a tul tih a sawi a ni.
Agriculture department chu sawrkar-in kalpui a tum mek thlai thar leh buh lei a tum chungchanga a kengtu tur an nih avangin thawktute tan a tul tih a sawi a. Buhah kan intodelh theih nan kan leilet hmun neihsa thawmthat ngai thawmtha a, khawl nen theihtawpa hma lak a ni dawn tih a sawi bawk.
Agriculture secretary Dr H Lianzela chuan agriculture chu chhungtin chawthleng thleng phak a nih avangin dept-in hma a laknaah theihtawp chhuah turin MASA member-te a chah.
Mizoram sawrkarin ‘The Mizoram Agriculture Service Rules 2009’ siamin, Mizoram Agriculture Service hi kum 2010-a din a ni.