PM Viswhakarma Scheme hnuaia kutthemthiamte training pekna tur chu Ningani khan Multi Disciplinary Training Centre Mizoram KVI Board, Zemabawkah Mizoram KVI Board chairman C Lalremliana’n a hawng a; chief executive officer JH Lalbiakliana’n he scheme hnuaia training turte fuihna thu a sawi bawk.
A hawnna inkhawmah hian National Skill Development Corporation (NSCD) Mizoram state coordinator Ellen Lalnunmawii leh State Level Banking coordinator Mizoram Lalphanglova ten PM Viswhakarma Scheme hnuaia training turte hriat tur pawimawh an sawi a ni.
PM Viswhakarma Scheme hi central sector scheme niin, 2023 September 17 khan Prime minister chuan a lo khuhhawng tawh a. Ministry of Micro, Small and Medium Enterprise (MSME) chu nodal department a ni. Ministry of Skill Development & Entrepreneurship (MSDE) leh Minstry of Finance-a Department of Financial Services nen tanduna kalpui a ni.
He scheme hi kutthemthiama eizawngte (local artisan leh craft person) tanpuina tura duan a ni a, trade 18-ah kalpui a ni a. Tanpui tura thlanchhuahte hi an training atangin an mamawh hmanrua leh incentive Rs. 15000 thleng an dawng thei a ni.
Basic training an neih zawh hian enterprise development loan cheng nuai khat, thla 18 chhunga rulh turin, interest 5% velin an la thei a. Loan rul tha leh digital-a transaction hmang tha te tan leh advance training nei tawhte tan loan cheng nuai 2, thla 30 chhunga rulh zawh tur an lei thei bawk.
Kutthemthiamte tan training buatsaih
Get real time updates directly on you device, subscribe now.