Kuwait beihnaah Indian thi, indonaah pariat thi ta

On Mar 31, 2026 1 0

Iran-in Kuwait-a power & water desalination plant a beihnaah Indian pakhat a thi niin thuneituten Thawhtanni khan an sawi a, Asia khawthlang buaina avanga Indian thi chu pariat an tling ta.
Doha-a Indian embassy chuan Pathianni khan ‘Kuwait-a desalination facility beihnaah Indian pakhat a thih thu lungchhiatthlak tak hriat a ni’ tih anb sawi a. Embassy chuan social media-ah, “Embassy hian Kuwaiti thuneitute nen thawhhona tha tak a nei a, a theih ang anga tanpuina an pe a ni,” a ti.
Kuwait-a electricity ministry chuan thuchhuah siamin power & water desalination plant hi ‘Iran-in an rama beihpui a thlaknaah’ beih a nih thu a sawi a, hei vang hian Indian hnathawk pakhat a thi a, building pakhat nasa takin a chhia tih an sawi bawk.
February 28-a Israel leh US-in Iran sipaite beihpui thlakin Asia khawthlanga buaina a chhuah hnua Kuwait-a Indian thi hmasa ber a ni a. Kuwait-ah hian India mi maktaduai khat chuang an cheng a, an rama ram dang mi awm tam ber an ni.
Tehran chuan Iran energy leh hmunhma pawimawh dangte beih a nih avanga phuba lak nan US sipai hmunpui awmna a thenawm ram, power leh desalination plant-te chu a beih dawn tih a sawi lawk a ni.
Kar hmasa khan United Arab Emirates (UAE)-a Abu Dhabi-ah missile-a kahna lo kahthlak perah Indian pakhat a thi a, mi dang pakhat a hliam bawk.
March 18 khan missile leh drone hmanga Saudi Arabia khawpui, Riyadh beihnaah Indian pakhat a thi bawk.
March 13-a Oman-a industrial area beih a nih avangin India mi pahnih an thi a, indona tan tirh lamah khan sumdawng lawngte beih a ni a, a thawk mi pathum an thi bawk a. India khua leh tui pakhat chin hriat lohin a awm mek bawk.
Arab ram eng emaw zatah pawikhawihna thlengah Indian tam takin hliam an tuar tawh a, heng zingah hian Saudi Arabia, UAE, Oman leh Iraq te pawh an tel.
Indian sorkar chuan tun hnaia heng ram hruaitute a biakah Asia khawthlang ram hrang hranga cheng Indian maktaduai 10-te himna a ngai pawimawh hle a. Saudi Arabia leh UAE-ah ringawt pawh India mi maktaduai riat vel an cheng a ni.