La Liga-in na takin Fifa sawisel

La Liga-in na takin Fifa sawisel
Tunhnai Rwanda rama Fifa inkhawmpui lianin Club World Cup khel thei chin huang zauha team 32 inel tawh tura a tih leh June 2025 atanga he inelna kum li dana kalpui tawh tura a tih bakah World Cup match khelh zat 104 ngawta a san chho chu Spanish La Liga lamin an duh loh thu an auchhuahpui nghal.
Tarlan tawh angin, tunkar Thawhlehnia Kigali, Rwanda-a Fifa Congress chuan 2026 World Cup atangin team 48-in tournament an khelh tawh tur thu leh match khelh zat pawh 64 ni thin atanga 104-a a punna an pawm a; 32-team Club World Cup pawh nemnghet nghalin, hei hi La Liga lam chuan na takin an dolet.
Spanish top flight thuneitute chuan Fifa demna tichhuak ve nghalin, an thutlukna chu national competition zahlohna a nih thu an sawi a, Thawhlehni veka thuchhuah an siamah Fifa-in world football calendar a pawngsual ni hiala an ngaih thu leh national championship pawimawhna pawh engahmah an ngai lo niin an sawi a, football community zahlohna ti hialin an auchhuak.
“An thutlukna siam atangin Fifa hian khawvel puma league hrang hrangte sum lama an dinhmun tlahniam tur a hlamchhiah chiang hle tih a hmuh theih a, vawiina inthlakthleng liantham an siamna kawngah league-te rawn kan ni lo a, a bik takin, annual club competition thar chungchangah kan thu leh hla an ngaichang eih lo.
“An thutlukna duanchhuah hian competitive hmasawnna lam a hawi lo a, sport leh economic lama national league, club leh player-te a nghawngpawi theih dan tur an pawisa lo a, fixture chepsa an nekchep zual a, club tlemte leh player tam lo takin an hlawkpui tur lam bak Fifa hian a ngaihtuah lo,” tiin thuchhuah an siam.
La Liga hian anmahni bakah professional association football league dangte inziahluhna World Leagues Forum (WLF) lamin Fifa thutlukna thar duanchhuah hi an zirchiangin, thutlukna chiang tak an siam ngei tura an ngaih thu an tarlang tel.
Nikum December thla khan WLF hian 32-team Club World Cup pawm tumna hi sawisel tawhin, he inelna khel thei zat team tihpun chiam hian football economy leh player-te hamthatna a tichhe thei niin an ngai.
Match calendar thar an duanchhuahte pawmtu Fifa Council hi football khawvela thutlukna siamtu (decision-making body) pui ber a ni.
Fifa Council-ah hian an pawl president Gianni Infantino telin member 37 an awm a, an zinga 28 chu member association theuhte thlanchhuah an ni. He Council-ah hian Europe football thuneitu sang ber Uefa pawh an tel ve bawk.