Labour first, pleasure next…

Education minister-in Govt Champhai High School kum 50 tlin lawmna nimina a hmanpuinaah an sikul motto Labour First, Pleasure Next tih chu tha a tih thu sawi in, zirlaite chu nakina eizawnna leh chhungkaw chawmna nei thei turin an sikul motto chu ngai pawimawha vuan nghet tlat turin a chah a.
He sikul motto Labour First, Pleasure Next tih hi thufing lar tak a ni a, a awmzia thuhmun tho siin sawi dan hrang hrang, “Duty before pleasure” tih te, “Business before pleasure” tih te a awm a; thil dang tam tak pawh a la awm thei ang. Mizo tawng chuan, “Tihtur tih zawhah nawmsakna lam chu” tiin a dah theih ang a; chumi awmzia chu, “Nawmsak/hmasawn kan duh/tum chuan, thawh/hreawm tawrh hmasak phawt a ngai” tihna a ni.
He thufing hi zawm a har viau a nih a rinawm a, Sapho pawhin an chai nasa thei hle a; a bawp lawkah lain, “Duty comes before pleasure, but only in the dictionary” te pawh an lo ti thin a; dictionary chauha dik thei, an ti a ni.
Mi hratkhawkheng, huaisen leh tumruh Napoleon Bonaparte khan thumal pakhat ‘Impossible’ (tih theih loh) tih chungchangah heti hian a lo dah ve thung a: Impossible is a word to be found only in the dictionary of fools tiin. Tum tak tak chuan tih theih loh hi a lo awm hran lo, tih a sawina a ni ber awm e.
Khai le, ram inrelbawlna lam nen i han suihzawm dawn teh ang. Kan ram hruaitute hian he high school moto labour first, pleasure next hi an lo zawm ve thin reng em tih han en ta ila. A tlangpuiin ‘duty’ aiin ‘pleasure’ hi an lo dah pawimawh hmasa zawk thin em ni a tih theih awm e. Sawrkar thar a lo pian hian, a enga mah hmain luxury car hi an buaipui hmasa tlangpui a, sawrkar hmasa te car hman aia changkang leh manto zawk car thar an lei a, sawrkar hmasa lo hman hlui car te chu department officer-te an chhawm kual tir thin. Thil dang pawh tam tak a awm thei ang.
Sawrkar department hrang hrangte pawh hi han bel chiang ila, an office building structure te, office property leh facility reng reng hi mawi, nalh, changkang leh man to, a saptawng takin luxurious tak hi a ni deuh vek mai. An tihtur ‘duty’ erawh an hlenchhuak tha nge tha lo tih chu kan ram economy te, kuthnathawktute dinhmun te, ei leh bar tharchhuah te, intodelh leh intodelh loh atangtein a teh theih ang. Labour first, pleasure next tih letling thawk hian kan khawsa ni berin a ngaih theih a. He motto hi ram hruaitute tan hlei hlei hian a pawimawh zual dawn hle niin a lang.