LAC chungchangah Beijing-ah India leh China inbia

India leh China chuan Ladakh khawchhak lama Line of Actual Control (LAC)-a thil awm dan chungchangah inbiakna ‘hlawk leh hma lam thlirna’ thui tak an nei a, ramria muanna awmin a pangngaia inlaichinna a awm leh theih nana hmasawnna a thlen theih thu an sawi.
Nilaini khan ram pahnih aiawhte chuan Beijing-a Working Mechanism for Consultation & Coordination (WMCC) meeting-ah ramri chungchang hi an sawiho.
Ministry of External Affairs (MEA) chuan inbiaknaah hian ‘thil tha zawk siam leh hma lam hun thlir a ni’ tih a puang.
Kum 2020-a Galwan Valley-a intihbuaina thleng leh a hnu kum li chuang zet sipai inepna na tak a awm hnuah kum khat chuang kalta atang khan India leh China hian muanna atana hma an la reng a, “India leh China ramri hmuna thil awm dan chu ram pahnihte hian an thlir a. Ramria remna leh muanna vawnhimna kawnga hmasawnna awmte chu an lungawi thu an sawi,” an ti a. Hei hian ram pahnihte inlaichinna chu zawi zawiin a pangngaia a awm leh theihna turin kawng a zawh tih MEA chuan a sawi.
China-a Special Representatives (SR) meeting neih leh tur atan inruahman lawkna siam turin an inrem bawk.
Nikum August thla khan National Security Advisor Ajit Doval-a leh Chinese Foreign Minister Wang Yi te chuan New Delhi-ah Special Representatives dialogue an nei a, ramria remna vawng turin thil tam tak a chhuah phah.
WMCC meeting-ah MEA chuan, “Ram pahnihte hian ramri siam, ramri enkawl leh ramri kaltlanga thawhhona chungchangah an sawiho a ni,” a ti.
MEA thuchhuah chuan, “Ram pahnihte hian palai leh spai level-a inbiakpawhna mumal tak neih chhunzawm zel an remti a, heng zingah hian 24th Special Representative inbiakna atanga inremna siamte pawh a tel a ni,” a ti.
India palaite hi MEA-a Joint Secretary (East Asia) Sujit Ghosh-a kaihhruai niin China palaite hi foreign ministry-a Boundary & Oceanic Affairs Department Director General Hou Yanqi-a kaihhruai an ni.
Ghosh-a hian Chinese foreign ministry-a Department of Asian Affairs Director Liu Jinsong leh Chinese Assistant Foreign Minister Hong Lei a be bawk.
WMCC thutkhawm hi India leh China ten an inkar tha lo siam that an tum laia neih a ni.
Palai leh sipai an inbiak hnuah Ladakh khawchhak lam LAC-a inepna hmun eng emaw zat atangin ram pahnihte hian an sipaite an hnuk kir a. October, 2024 khan Depsang leh Demchok tan disengagement pact an siam a, hei hi Ladakh khawchhak lama inelna hmun hnuhnung pahnih a ni.
Inremna siam a nih atanga ni eng emaw zat hnuah Prime Minister Narendra Modi-a leh Chinese President Xi Jinping-a chu Kazan-ah an inbia a, inlaichinna siam thatna tura thutlukna eng emaw zat an siam.
Nikum August thla khan Modi-a hi China-a Tianjin-ah kum tin SCO summit neih thinah tel turin a zin a. Xi-a nen summit neih karah an inbe leh bawk.