LAD minister-in Ngopa lawmpui

LAD minister-in Ngopa lawmpui
India ram puma village council (Gram Panchayat) tha bera thlan an nih avangin Local Administration Department minister K Lalrinliana chuan Ngopa khaw mipui lawmpuina a hlan.
Thuchah siamin LAD minister chuan, Mizoram mai ni lo, India ram puma village council 250000 chuang zinga tehfung hrang hranga teh hnua VC tha ber an ni thei chu Mizoramin a chhuang takzet tih a sawi a. India ram state kilkhawr ber, Panchayati Raj institution hman ve lohnaah Ngopa khua, khawtlang mipui inlungrual leh thawkrim, khawtlang hruaitu tha leh a ngaihna hria an awm chu India ram puma Mizoram hmel lanna, kan mawina an ni tih a sawi.
He lawmman dawn theihna atana mipui leh khawtlang hruaitute, Lengteng bialtu MLA Dr L Thangmawia, Ngopa leh Saitual district-a sawrkar hnathawk, LAD hnuaia thawktute thawhrimna a chhuang hle tih sawiin, ‘Hetianga thawhhona tha kan nei hi a lawmawm hle a ni,’ a ti.
India sawrkarin Localization of Sustainable Development – khawtlang atanga hmasawnna ngelnghet, chak takin a kalpui tanna atangin kum khat a tling ve ta tih minister hian a sawi a. He hmalakna bultan khuhhawnna New Delhi-a nikuma neihah Mizoramin theihtawp a chhuah tur thu a lo tlangaupui tawh tih sawiin, ‘Kan khawtlang mipuiin an zir avangin hlawhtling thei ber tur kan nih thu ka lo sawi tawh a. Hemi hlawhtlinna tura thahnemgaihna nen Ngopa an lo pen chhuak leh, kum khatnaah a hlawhtlinna hmahruai kan hmu thei nghal hi a ropui hle,’ a ti. He lawmman dawn atang hian nasa lehzuala hma an sawn a rin thu leh kum dangah pawh lawmman tha tak an dawn leh theihna’n duhsakna a hlan tih a sawi a ni.