SHG tan Lungleiah dawr siam
NABARD leh World Vision India tangdunin thingtlanga retheite dawmkanna atana an hmalakna pakhat, Women’s Self Help Group Variety Store (Gram Dukan) Lunglei Venglaia an siam chu Thawhtanni khan Lunglei bawrhsap Ramdinliani’n a hawng.
Bawrhsap chuan self help group ti mai mai an awm laiin, a titha engemawzat dawkchhuak an awm chu lawmawm a tih thu sawiin, an thanlen zelnaa hmalakna chu SHG-te taimaknaah a innghat a, tanpuina a tawp ruala chaurau mai lo tura tan la turin a fuih. Phai lam hmun thenkhatah SHG hmanga chhungkua an chawm theih chuan, lehkha thiam tamna Mizoramah SHG-ten kan hlawhtlin theih loh nachhan tur a awm lo, tiin, kan thil zawrh leh fun dante mawi zawk leh mi hip zawka siam a pawimawh tih a sawi bawk.
NABARD Lungleia district development manager Evan T Munsong chuan NABARD hmalakna pakhat, ‘SHG Dawr’ chu thingtlang lama rethei zawkten man man zawk leh daih rei thei tur bungrua leh hmanrua hmanga mahni intohdelha sumdawnna kalpui tura bank tanpuina, a bikin hmeichhiate zingah kalpui thin a ni tih a sawi a. He programme kaltlang hian sum leh paia mahni intungding thei lo te hnenah loan hmangin tanpuina sumfai pek thin a ni tih a sawi.
NABARD chuan World Vision India kaltlangin Rs. 4,01,000 pein SHG Dawr hi Obadia SHG enkawl turin Venglai Lungleiah a din a. Dawr hi Obadia SHG te tan chauh nilo, lo neia eizawngte, puantahtute leh a dangte tan kawng kawhhmuhtu leh an thil tharchhuah leh siamte hralhna kawnga puitu tura ruahman a ni.
SHG tan Lungleiah dawr siam
Get real time updates directly on you device, subscribe now.
Next Post