Mipui dikna chanvo leh zalenna palzutin ZPM sawrkar chu rikrap leh vau zawngin a kal a, N Korea ram anga mipui zalen lohna ramah Mizoram a siam mek tih Congress Thalai chuan an sawi.
Congress Thalai Hqrs. thuchhuak chuan, ZPM sawrkar hnuaiah political transfer, FIR hmanga inrikrapna, sawrkar duh khawp lohna sawi jail-a khung, invauna, democracy rah behna, dan palzuta inrikrap, open tender lem, departmental works lem, GFR, CPWD Works Manual leh The Mizoram Public Procurement Rules 2020 pawngsualna a thleng tih a sawi.
‘Democracy ram, secular kan nihnaah mitinin zalenna kan nei vek a. India danpuiin thusawi kawnga zalenna zau tak min pek angin mitinin kan duh zawng sawichhuah theihna, sawrkar kalphung leh ram hruaitute sawisel theihna zalenna zau tak kan nei a. Midik an ngawih rengna ramah mipui himna leh dikna palzut a ni thin. Sawrkar sawiselna zawng zawng hi sawrkar pawisawina leh intih hmingchhiatnaa puh zel tur a ni lo,’ a ti a. ZPM sawrkar chuan dikna an duh loh zia leh mahni inhaivur an tum zia a tilang niin a sawi.
Assembly House-ah thudik lo a sawi avanga ngaihdam dil hial Pu Lalduhoma pawh chief minister a nih hma leh a nih hnua thudik tawk lo leh belhchian dawl lo a sawi avanga FIR thehluhna tur tam tak a awm tawh bakah an minister leh MLA zingah thu belhchian dawl lo an sawi avanga FIR thehluhna tur tam tak a awm tih Congress Thalai hian sawiin, ‘Hetiang a nih lai a, anmahni sawiseltu, mi chak lo zawkte laka thuneihna hmangsual a, thubuai thehluh leh police chakna hmanga inrikrap zel hi kan hrethiam lo,’ a ti.
Congress a sawrkar loh apiangin Mizoramah buaina leh harsatna, mipui thlabarna leh him lohna a thleng ziah tih thuchhuah hian sawiin, ZPM sawrkarin mipui hnena an inzawrhna tihhlawhtlin aia defamation case file leh FIR hmanga mipui rikrap an dah pawimawh zawk chu sim a, mipui hnena an inzawrhna leh intiamna tihlawhtling zawk turin an phut tih a sawi. Mipui zahlohna leh thamlohna, an dikna leh zalenna rahbehna chu Congress Thalai chuan na takin a do dawn a, mipui dikna humhalh a, an zahawmna hum turin hma a la dawn tih a sawi a ni.
ZPM-in North Korea ram angah Mizoram a siam mek – Congress Thalai
Get real time updates directly on you device, subscribe now.
Prev Post