Lainey Wilson Grand Ole Opry induction

Academy of Country Music (ACM) leh Country Music Association (CMA) ten kumina award an semnaah Entertainer of the Year a dawng ve ve a, Lainey Wilson chuan a rimawi zin kawngah mellung pawimawh a phun leh ta, Grand Ole Oprey-ah an seng lut ve ta.
Khaw lian lo tak Baskin, Louisiana a piang, Lainey Wilson hian hmeichhe naupang kum 9 mi chauh a nih laiin a vawi khat nan a chhungte nen Grand Ole Oprey hi an tawlh a, an khua atanga mel 471 a hla a ni, chutihlai chuan engtikah emaw chuan chu stage ropui-ah chuan la chuankai ve ngei tumna rilru a nei tan ta a, kum 20 chuang a liam hnuah a duhthusam chu tihpuitlin a ni ta a, country artist te duhthusam, seng luh a nih hma chuan kim lo awm tlata an inhriat thinna Grand Ole Oprey-ah ngei mai chuan Lainey Wilson pawh an lalut ve ta.
Lainey Wilson official induction hi country legend Trisha Yearwood leh Garth Brooks ten hmangin, Wilson chuan, “Zanin hi ka nuna zan ropui ber a ni hialin ka hria,” a ti.
Yearwood chuan, “Zanina heta kan tel thei hi ropui kan ti. Chutihrualin ka hawi lam ka lo tina deuh pawh a ni mai thei a, mahse, Grand Ole Oprey-ah hian hmeichhe lakluh hi an tam tawh lutuk tih a awm thei lo vang. Inhrethiam ang chu maw. Country music hmangaihtu rilru chu kan man vek ang a, Opry hi a ngainat loh theih loh. Country music hmalam hun ka thlir hian, nang i tel loh a kim dawn lo,” a ti.
Brooks pawhin, “Ka lawmpui hle mai che, chutihrualin Grand Ole Opry pawh ka lawmpui e. Nang ang rual hetah hian hmuh tur kan vang thin em a ni. Award an pek che te chu hun inher angin a chuai ve mai ang, mahse, engtik lai pawha danglam ve lo tur chu he chhungkua hi a ni,” a ti ve bawk.
Lainey Wilson hi country music-ah a che tha le a, a album hnuhnung ber ‘Bell Bottom Country,’ avangin ACM leh CMA Award-ah album of the year a dawng ve ve a, Grammy-ah pawh best country album a dawng bawk. Chumai a la ni lo, ACM leh CMA Award-a award ngaihhlut ber entertainer of the year a dawng ve ve bawk.