Sialhawk leh a chhehvela lakhuihthei chingtu khaw pariat chuan sawrkar phalnaa lakhuihthei wine siam tumin sawrkar hnenah ‘Pineapple Wine Rules’ siamsak turin an dil. An lakhuihthei tharchhuahte awmze nei leh man man zawka hralh a nih ve theihna’n lakhuihthei chingtu khaw 8 – Sialhawk, Tlangpui, Tlangmawi, Khawhai, Lungtan, New Chalrang, Chalrang leh Vangtlang te chuan Pineapple Wine Rules siamsak tur hian an dil mek a.
The Aizawl Post thudawn danin, Sialhawk Village Council chuan 2022 October 10 khan khatihlaia Excise & Narcotics minister Dr K Beichhua hnenah lehkha thehlutin, an lakhuihthei thar hralhna kawngah harsatna an tawh nasat thin thu thlenin, Champhai leh Hnahlana grape chingtute tana sawrkarin Wine Rules a siamsak anga Pineapple Wine Rules siamsak ve turin an ngen. Kumin January 18 khan Sialhawk leh a chhehvela lakhuihthei chingtu khaw 8-te hian inthurualin Excise & Narcotics minister Er. LalRinawma hnenah Pineapple Wine Rules siam sak tura ngenna an thehlut leh a ni.
Hetihlai hian Sialhawk leh a chhehvel khuaten Pineapple Wine Rules an dilnaah hian opposition party – Congress leh ZPM chuan ‘No Objection Certificate’ an pe tawh a; BJP pawhin an thlawp tih thu dawn a ni.
Pineapple Wine Rules siam an dil bawhzuina nia ngaih hian May 18 khan Excise & Narcotics hotute chu minister tirhin Sialhawkah an kal a. Sialhawk VC leh Pineapple Growers Society te nen Wine Rules dil chungchangah hian an inkawm.
Sialhawk VC leh Pineapple Growers Society hruaitute chuan, lakhuihthei atanga wine siam hi sawrkarin a phalsak a nih chuan, kumtina lakhuihthei quintal engemawzat hralh loha luangral ziah thin chu a reh tawh anga, kuthnathawktuten hah taka an thawh chhuah atanga an sum lakluh pawh nasa takin a pung thei dawn tih an sawi a ni.
Sawrkar lam atanga The Aizawl Post thudawn danin, Wine Rules siam dil bawhzuina hi a bul an la tan chauh a, minister-ah report a luh hnu ah, cabinet te a paltlang a la ngai dawn a, a kawng a la thui dawn tih sawi a ni.
Sialhawk Pineapple Growers Society chhinchhiah danin, Sialhawkah hian lakhuihthei chingtu chhungkua 250 an awm a. Nikum khan an khuain lakhuihthei quintal 14000 an thar. Chu’ng zinga quintal 2000 vel chu chhan hrang hrang vangin hralh lohin a riral a. Aizawl lama hralh tura an thawn, a man an hmuh tak loh pawh cheng nuai 6 man a tling tih an sawi.
-- Advertisement --
Kum 2022 chhunga Sialhawk leh a chhehvel khuaten lakhuihthei an tharchhuah dan:
# Thar hnem ber Sialhawkin quintal 14000 vel tharin an ni hi India ram pawna thawnchhuak awmchhun an ni a, quintal 10 an thawn. Hemi atanga an sum lakluh hi cheng nuai 160 chuang a ni.
# Khawhai, Lungtan, New Chalrang ten quintal 1000/2000 chuang an thar vek a. A thar tlem ber pawl Tlangmawi pawhin quintal 230 vel an thar a, cheng nuai 2 chuang an lalut pha a ni. Khaw dang hian nuai 30 atanga nuai 6 inkar an lalut. An ni zinga khaw 5 hian India ram state hmun dangah an thawnchhuak bawk a, a vaiin quintal 1500 vel nia chhut a ni.
# Khaw 8-in nikuma lakhuihthei an thar zawng zawng hi quintal 20000 chuang a ni a. An sum lakluh zawng zawng hi nuai 250 chuang a ni.