Lal duh vangin MNF-in mipui a bum – Faggan Singh Kulaste

MNF sawrkar chuan lal duhna avangin Mizoram mipui a bum a, chhungtin cheng nuai thum a tiam tawh tun thlengin a la pe lo, tiin central minister Faggan Singh Kulaste chuan a sawi.
Mizoram tlawha lo zin Union minister of state for Rural Development and Steel Faggan Singh Kulaste hian Nilaini khan BJP State office tlawhin party mite a kawm a. Mizoram chief minister Pu Zoramthanga kaihhruai chuan Prime Minister Scheme hrang hrang bakah central schemes hrim hrim a kalpui tha lo hle a, miretheite hmakhua a ngai lo hle tih a sawi.
“Pu Zoramthanga kaihhruai sawrkar hi lal duhna avanga mipui bumtu a ni. Kum 2018 inthlan laiin Pu Zoramthanga hian Mizoram chhungkaw tinte cheng nuai 3 theuh pek intiamin a in vote tlin tir a. Vawiin thlenga a pe lo hi mipui bumna lian tak a ni,” tiin, hetiang inbumna laka fimkhur tawh turin mipui a chah tih a sawi.
Sawrkar laipui chuan Mizorama sum an pek tur reng reng bat emaw pek tlai emaw a nei ngai loa, state chief minister, Finance minister ni bawkin sum a manage thiam loh avangin Mizoramin sumah harsatna a tawk mai a ni tih Faggan Singh Kulaste hian a sawi.
“Mizoram sawrkar hi sum a taka hman hmaa utilisation certificate pe thei awmchhun a ni tih hi central minister lokalte hian kan hre chho mek. UC an rawn thehluh leh a taka hnathawh hmuh tur mumal awm lo te, sum sanction-na rei tawh hna awm si lo te hi enge a chhan, tih hi, 2023 MLA inthlan hma in Pu Zoramthanga sawrkar hi lo zawt turin Mizoram mipui ka chah che u a ni,” a ti.
India ram state zawng zawng tumah thliar loin Narendra Modi kaihhruai chuan PM Scheme hrang hrangah hma a la a; BJP leh a thawhpuite sawrkarna state-ah chuan tha taka an kalpui avangin miretheiten nasa takin hma an sawn a, state pawhin a changkan phah a. Mizoramah erawh PM scheme hrang hrang miretheite chawikanna tura duante ngaihthah niin, mipuiin an chhawr lo hle tih central atanga minister lo zin thinten an hmu chiang hle, tiin Union MoS hian a sawi. “Mizoram hian mipui, mirethei hmangaihtu, development hna thawk thei tur sawrkar leh chief minister in mamawh a ni,” a ti.
Hmasawnna dik leh tha leh tluantling neih theihna’n leh, a taka PM Modi Mizoram mipuiin hna an thawh tir theihna’n, 2023 MLA inthlan chu hmang tangkai turin mipui a ngen tih a sawi bawk.