Lammual ram, Aizawl pianna

Lammual ram hman dan tur chungchangin titi a luah mek a, thingkung kih tumna leh a dodalna chungchangah inhnialna a chhuak mek bawk. Lammual ram hi thil dang atana hman duh an awm a, a ngai ngaia daha humhalh duh an awm bawk. Tihdanglam remti lote hian Lammual ram hi Zofate hmun pawimawh, history-a hmun pawimawh, Aizawl pianna a nih vangin a ngai ngaia dah an duh a ni.
Prof JV Hluna, historian chuan, “Lammual ram hi heritage a ni a, a nih ang anga humhalh hi kan tih tur, kan bat a ni,” a ti.
Aizawl lo pian tanna a nih thu a sawi a, Quarterguard chu 1897-a sak a nih thu leh, hei hi Aizawl lo pianna atana thil pawimawh a nih thu te sawiin, “Sapho kha kan lo do let a, mahse min awp ta a. Aizawlah an inbengbel a, anmahni lo dotute kha min hneh a ni tih tihlan an duh a ni ang, tukluih kuli hmangin Lammual min laihtir a, quarterguard min saktir a, chutianga kan pi leh pute tuarna hmun chu a ni a. Tihdanglam hi kan remti tur a ni lo,” a ti.
“Kan lo do avanga min hremna tiin a sawi theih a, chuta tang chuan Aizawl khawpui a lo piang ta a. Chumi sulhnu chu kan hmuh phakah a awm a, kan khawih phakah a awm a. Tihchhiat kan tum ta mai hi kei chuan na ka ti lutuk,” tiin a sawi zawm a ni.
Thingkung heti zat kih tum a ni hi pawi a tih thu a sawi a, building thenkhat an lo thiat tawh pawh pawi a tih thu a sawi.
“A ram hmelhmang hi kan heritage a ni a. Thingkung hi environment zawnga a hlut bakah heritage a tling. Gate pui bula bung lianpui mai kih tum a ni te hi a pawi tak zet a ni,” a ti.
Hnam dangin an sulhnu hlui an zah a, an humhalh thin thu a sawi a, chu chu hnam kalsiam atan a pawimawh tih a sawi.
Thil hlui leh ro hlu humhalhtu pawl INTACH Mizoram Chapter pawhin Lammual ram tihdanglam hi an duh lo a, sorkar hmasa hun lai khan hei hi an lo thlen tawh. Anni hi kar leh lamah an thukhawm dawn nia hriat a ni.