Lammualah Winter Festival nei

Mizoram Tourism department buatsaih, ni ruk awh tur Winter Festival 2023 cum Mega Exhibition chu Aizawl Sipai Lammualah Thawhtanni khan neih tan a ni.
Festival hawngtu Tourism minister Lalrinpuii chuan Mizo kutchhuak leh kutthemthiamna phochhuahna remchang tha tak a ni, tiin, tourism chu industry a nih angin eizawnna tha tak a nih rualin, India hmarchhak tlawhtu khualzin zat atangin Mizoram chuan za zelah 0.01 chauh tlawhtu a nei a, chona min petu nise a duh tih a sawi.
Tourism hnuaia thawk zawng zawngte nasa lehzuala tan la turin a sawm tih a sawi a. Sawrkar thar an siam atangin thalaiten eizawnna tluantling an neih theih nan tourism industry kaihhnawihah training buatsaih tum a nih thute, zinmite enkawlna – tourist management lamah pawh hma lak a nih tur thu a sawi bawk.
“Kan ram ralmuang leh sik leh sa nuam em em hi khawvel huapa kan zawrh thiam a tul a. Tourism hi ‘smokeless industry’ a nih angin, sik leh sa vawnthat nan pawh a pawimawh a, kan ram economy than chhoh zelna atana kalkawng pawimawh tak a ni,” Lalrinpuii hian a ti.
Winter Festival cum Mega Exhibition-ah hian food court tiamin stall 100 siam a ni a. Thil chi hrang hrang, Mizo kutchhuak thiamthil lei theiha phochhuah a ni. Nitin chawhnu dar 2 atanga zan dar 10 thleng programme hrang hrang, zai leh lam ena ngaihthlak tur a awm dawn a ni.