Larsap Hari Babu Kambhampati chuan ni hnih cham turin Nilaini khan Champhai a thleng a. Head of offices, bank hotute, political party, kohhran leh tlawmngai pawl hruaitute a kawm nghal.
Mipui hmakhua ngaia sawrkar kaltlanga scheme-te tha taka kalpui a tul tih sawiin, power supply, inbiakpawhna, in sak tanpuina, inkalpawhna, eirawngbawlna gas, in tina tui in tur pek leh a dangte chhawpchhuah kawngah tan lak a tul tih a sawi.
-- Advertisement --
Line department leh bank hotute chu khua leh tuite tana duan scheme-te mipuiin an hriata an chhawr tangkai ngei theihna’n zirtirna tam zawk kalpui turin a chah a. Scheme an hriat mai piahlamah a taka an chhawr tangkai ngei theihna’n hma lakpui a, tih dan kawhhmuh an tul tih a sawi a ni.
Amah tawiawmtu Champhai South bialtu MLA, minister TJ Lalnuntluanga chuan Champhaia Mizoram University Eastern Campus dah a nih theihna’n tan lakpui turin larsap hi a ngen a. Land Custom Station (LCS) Zokhawthar chu Integrated Check Post (ICP) a hlankai thuai a, dan mumal tak hnuaia insumdawntawnna kalpui a nih theihna’n a tul anga hma lakpui turin a ngen bawk.
District bawrhsap James Lalrinchhana chuan district chanchin, centrally sponsored scheme kalpui dan leh hmasawnna a sawi a. SP Lalrinpuia Varte chuan venhimna kawnga police hnathawh, dan leh thupek kenkawh kawnga an dinhmun a sawi bawk.