Larsap-in IIMC zirlaite kawm

Indian Institute of Mass Communication (IIMC) North Eastern Regional Campus, MZU-a zirlaite leh zirtirtute chu larsap Dr Hari Babu Kambhampati chuan Nilaini khan Raj Bhavan-ah a kawm.
IIMC zirlaite hnenah hian tunlai khawvela media pawimawh leh a tangkaina a sawi a. Journalism, advertising, content creation, public relations leh a kaihnawih thildang hmanga mipui kaihruai chungchang leh new media chungchang a sawipui. IIMC zirlaite chu Mizoram an hmuh dan a zawt a; Mizoramah khualzin tam zawk hip a nih theihna tura thil pawimawh nia an hriat te a zawt a ni.
IIMC atang hian zirtirtute leh zirlai 31 an tel a. Tunah IIMC NER campus-ah hian digital media course zirlai 16 leh English journalism couse zirlai 16 an awm a ni.
IIMC North Eastern Regional campus hi Mizoram University campus-ah 2011 August 8 atang khan kalpui tan a ni a. Tunah hian regional director LR Sailo, zirtirtute leh staff ten an enkawl a. IIMC hnuaia zirchhuakte hi tun thlengin campus interview, IIMC Delhi kaltlangin hna an la hmu vek a ni.