Chinese millionaire beidawng takzet

Chinese millionaire chuan an rama university entrance har lutuk chu tum 27 a hmachhawnah a hlawhchham vek thu a sawi.
Tun hnaia exam result tihchhuahah kum 56-a upa Liang Shi chuan 750 point hmuh theihah 424 chauh a hmuh thu a sawi a. China a university lut thei tura a mamawh chu 34 point laiin a la phak lo a ni.
Kumin hian exam beitu mi maktaduai 13 an awm a, Liang hian higher education chhunzawm zel tuma a beihnaah media ten a chanchin an buaipui nasa hle a ni.
Kum 1983 atang tawh khan a exam nual tawh tiin local media te hnenah a sawi a, kumina result chhuak chuan a tihlunghnur takzet thu sawiin a dream tihlawhlting theia awm dawn lo hialah a siam thu a sawi a.
“Ka tlin theihlohna chhan tur ka hre lo ka ti thin a, tunah erawh ka kehdarhin ka hria” tiin Sichuan chhuak Liang Shi chuan a sawi a.
China-in university entrance exam a neih hi Gaokao tih niin exam harsa leh khirh tak niin high school chhuak tena Chinese, mathematics leh English bakah science emaw humanities an duh subject thlanga exam an beih thin a ni a.
Kum 2021 khan Chinese sorkar data chuan exam candidate atangin 41.5% in paltlangin university emaw college-ah an lut a ti a.
Gaokao hi make-or-break opportunity anga ngaih niin a bik takin mirethei chhungkua tan a ni bik zual a, China-ah hian hna tha neih nan degree neih chu tihmakmawh a la ni reng bawk.
He test hi China education system-ah kum 1950 chho atang khan hman tan a ni a, Cultural Revolution laia chhunzawm loh zawk tih loh chu kalpui a la ni ta reng a ni.
Liang chuan university tha leh lara luha ‘intellectual’ tia sawi nih chu a duh ber a nih thu a sawi a. Kum 1983 khan kum 16 mi lek niin a exam hmasa ber a, chumi hnuah hna hrang hrang thawkin a exam zui zel a ni.
Factory a thawhna chu a tlakchhiat hnuah Liang chuan timber wholsale business kum 1990 tir lam khan a tan a, a hlawhtlinpui hle a, kum khat chhunga millionaire ni maiin chumi hnuah construction material business lam a luhchilh leh a ni.
Kum 2001 khan Chinese sorkar chuan Gaokao exam tura kum bithliah siama tihtawp hnuah exam a bei tha leh a, tum khat tih chauh, chu pawh hrisellohna avanga a exam loh tih loh chu kum tin a exam zui ta zel a ni.
Gaokao paltlang a tum nan hian a bei nasa hle a, a zu in pawh bansan vek hialin a zirlaiah a insawrbing ngut mai a ni. Mahse, a hlawhchham leh hnuah a exam zui zel ang em tih a chian tawh loh thu sawiin, “Ka bei zel dawn nge ka chiang tawh lo,” tiin a sawi a. “Nakumah chuan ka chhunzawm tawh lo mai thei a. Nakumah ka exam a nih pawhin ka hlawhchham leh chuan ka hming tawpa Liang hi ka paih ang,” tiin a sawi.