Last 32-ah France leh Norway

World Cup 2026 khelh mekah Thawhlehni zing khan France leh Norway ten hnehna an chang a, Group I atangin last 32 an lut. France leh Norway te hian group champion nih an inchuh zui leh dawn.
Iraq dan theih loh France
Senegal hneha point thum hmu tawh France in Norway laka tlawm a, point la hmu lo Iraq chu Lincoln Financial Field, Philadelphia ah an hmachhawn. Iraq lakah an chak a nih chuan last 32 lut chiang nghal tur an ni a, Didier Deschamps a team te hian chak a, last 32 luh chian nghal ngei tumin tan an khawh. Last 32 beisei zui turin Iraq in tlawm pumpelh tum viau mah se team lian France lakah tih theih an nei tam lova, 3-0 ngawtin an tlawm.
Senegal lakah hnehna chang bawk mah se first half an khelh that tawk loh vangin France team lakah zawhna tam tak a awm. Coach in Iraq lakah engtin nge a team a rem ang tih chu football ngainatute hriat chak a ni. Coach tawnhriat ngah Deschamps hian hliam tenau a neih vangin Theo Hernandez a awltir a, a aiah Lucas Digne a luhtir. Midfield-ah Tchouameni awltirin Manu Kone a luhtir a, tlarhmaah Senegal laka goal thun Barcola chuan Desire Doue nekchhuakin bul a tan bawk. Senegal laka beisei phak lo Ousmane Dembele chu a lai atangin a sirah a insawn a, Michael Olise nen an tlanna an inthleng. Iraq lakah an that theih dan ang berin an inrem ta a, goal chhuah lovin goal thum an thun zui ta reng bawk.
France hian ngam takin Iraq an nawr a, goal pawh an thun thuai. Kylian Mbappe chuan a thiamna hmunah ngei ball tha leh hmun thawl a hmuh a, minute 14-naah khawh zeta pet goal in hmahruaina goal a thun. Hma takah goal an thun vangin France an phur leh zual a, inrintawkna sang zawk nen an inlan chhunzawm.
Team lian lakah goal chhuah hmasa bawk mah se Iraq an buai mai lova, rin phak baka thain an inlan chhunzawm. Thothang tha takin inlan bawk mah se Iraq hian goal thun tur khawpa an khingpui tlarhnung thiah darh erawh an harsat a, hun tha an insiam hleithei meuh lo. France pawhin goal thun belh tum viau mah se an thun belh thei bik lawk lova, chawlhlawk hmain goal khat bak hmuh tur a awm lo.
Thlipui leh ruahsur vangin France leh Iraq inkhel hi a khaihlak reng a, tan hun pangngaiah second half tan theih a ni lo. Game a khaihlak reng hnuin inkhel chhunzawm leh a ni a, goal hnih nen France an kir.
France tan hian goalhhmahruai thuntu Kylian Mbappe chuan seond half tantir lam minute 54-naah an goal hnihna a thun a, an hmahruaina a tizau. France tana goal thun hnem ber record thar siamtu Mbappe chian World Cup 2026-ah vawi hnih khelin goal li a thun tling der tawh a, World Cup a goal thun hnem ber ni thin Miroslav Klose record a nihrual chiah a. World Cup a goal thun hnem ber record thar siamtu Lionel Messi chu goal hnihin a la phak lo. Mbappe leh Lionel Messi te hi World Cup 2022-ah khan Top-scorer nih tumin an lo inel zak zak tawh a. World Cup 2026-ah pawh Top-scorer nih bakah World Cup-ah goal thun hnem ber nih tumin an inel leh hle dawn niin a lang.
Mbappe goal thun hnu hian player hmuhnawm Dembele chuan minute 66-naah an goal thumna thunin, an chakna a nemnghet. Iraq i an si phurh sut tum viau mah se hun tawp thlengin goal an thun thei lo va, France lakah 3-0 ngawtin an tlawm a, World Cup 2026 atangin a tla a ni deuh ber tawh a, an dinhmun a chhe tak zet tawh.
Norway leh Haaland an kal zel
Group I a inkhel dangah team ngaihven hlawh zinga mi Norway chuan Erling Haaland hovin hma lam an pan zel. Norway hian fiahna hautak paltlangin MetLife Stadium-a an khingpui Senegal chu 3-2 in an hneh a, last 32 an inhlangkai. Senegal lakah hian goal thun thei Haaland chuan a hna pangngai thawk chhunzawmin, goal hnih a thun.
Rinlawk ang ngeiin Norway leh Senegal te an inhnehtawk viau a, goal pawh a lut har hle. Goal lut a awm theih lawk loh hnuin Marcus Holmgren Pedersen chuan chawlhlawk dawn hnaih minute 43-naah hmahruaina goal a thun a. Pedersen goal thun hmang hian 1-0 a hmahruai chungin chawlhlawk an hmang.
Chawlhlawk hnu lamah Norway an khel tha leh zual a, goal an thun belh thuai. Second half tan atanga minute thumna lekah Erling Haaland chuan an goal hnihna a thun a, an hmahruaina a tizau. Si hnih faia an hnufual hnuin Senegal tan Ismaila Sarr chuan minute 53-naah goal thunin an si phurh a sut then.
An si phurh an sut then vangin phur viau mah se an phur rei lo. Minute 58-na lekah goal thun tura duan Erling Haaland chuan an goal thumna thunin an hmahruaina a tizau nawn leh. Goal thun thei Haaland hian World Cup a khelh hmasak berah goal hnih a thun nghal pang a> Senegal lakah goal hnih thun lehin World Cup-ah match hnih atangin goal li a thun tling der a, goal thun thei bik a nihzia a lantir chhunzawm zel.
Goal hnihin hnufual nawn leh mah se African champon Senegal an beidawng mai lova, point hlawhchhuah ngei tumin thapui an thawh. Hun pek belh minute 90+3-ah Ismaila Sarr chuan an goal hnihna thunin Norway nen an inkar a tizim nawn leh. Norway lakah tlawm pumpelh tum viau mah se goal dang an thun belh thei tawh lova, uiawm takin an tlawm zui ta a ni.
An dinhmun leh an hmabak
Group I ah hian France leh Norway ten point ruk ve ve hmuin last 32 an lut chiang tawh a, goal difference-a tha zawk France in table chung ber an luah. France leh Norway te hi June ni 27, Inrinni zing dar 12:30 ah an inhmachhawn zui dawn a, Group champion zawnna a nih dawn vangin inkhel pawimawh tak a ni a, inkhel hmuhnawm tak a nih a rinawm bawk.
Group I-ah hian Senegal leh Iraq in point an la hmu lova, anni pawh hi Inrinni zing dar 12:30 ah tho an tintum ve dawn bawk a. An inkhela chak zawk tan last 32 luh theihna kawng zau lutuk lovin a la inhawng.