Rashtriya Uchatar Shiksha Abhiyan (RUSA) hnuaia Law College building sak mek chu a nih dan tur ang a ni lo nasa tih sawi a ni a. Contractor-te chu college danga an hna pawh a tha lo tih ‘law’ zirlaite chuan an sawi.
Govt Mizoram Law College-a Student Bar Council chuan an college academic building sak mek leh sak hun tur chhunga an la sak zawh loh chungchangah thil diklo leh felhlel a tam nia an hmuh thu hi sawiin, he building thar sakna tur cheng nuai 170 dawn a ni a. Building sa tur hian 2020 May 4 khan work order chhuah niin, 2022 January 4-a zawh tura tih a nih laiin, tun thlengin sak zawh a la ni lo.
A hun taka college building sak zawh a nih theihna’n Student Bar Council leh an college a “Building Committee” ten contractor – Sky Ridge Construction & Consultancy Services, RUSA atanga hnathawh viltu engineer-te leh Higher & Technical Education minister te vawi tam hmu in, an harsatna leh manganna an thlen thin a, ngaihsak an hlawh lo tih an sawi.
Tuna contractor-te hnathawh chin chu a lungawi thlak loh takzet tih sawiin, a ban leh beam inzawmnate hmun tin deuhthaw ah a khi nasa a, an slab chhun tawhte a nghet loin a su thei tih an sawi bakah building sak zawmna tura iron-rod an inchhawp mekte chu a tuiek nasa a, building structure dinglai chu sak chhunzawm zel chi ah an ngai lo tih an sawi a ni.
Ram tana hmasawnna pawimawh tak zirna in hrang hrang sak hna thawk tura contractor rintlak loh leh hna chhe lutuk duhsak taka sawrkain restricted tender hmang a thawhtir chu an dem takzet tih sawiin, Sky Ridge Construction & Consultancy Services lakah hian dan ang taka na taka hma la turin an phut tih an sawi.
Student Bar Council chuan kumin March thla chhung ngeia an college building chu hmanraw tha leh rintlak tak hmanga sak zawh sak an phut tih sawiin, an phut anga tihhlawhtlin a nih loh chuan dan anga hma lak chhunzawm an tum tih an sawi a ni.
-- Advertisement --
Student Bar Council chuan –
# College building sak zawh hun tur atanga thla 12 a ral hnu ah pawh zaa 40 chauh zawh a la ni a. Heti chung hian RUSA lamin building sakna tura ruahman atangin Rs. 1,17,96,000 an pe chhuak tawh a, contractor-in hnathawktu, sub contractor-te zingah inngeih lo an awm, tih chhuanlam an siam avangin March 2023 thleng pawhsei sak an ni tih an sawi.
# Contractor – Sky Ridge Construction & Consultancy Services hian RUSA hnuaiah restricted tender vekin Mizorama college hrang hrang 15-ah contract cheng vaibelchhe tam tak man an hmu a, college hrang hranga an hnathawh pawh a tha tawk lo tih an sawi.
# Building saknaa hman tur cement hi MPWD laboratory-ah emaw Quality Control/ Department of Civil Engineering MZU laboratory-ah emaw thla thum dana endik ziah tur a nih laiin, vawikhat mah an la endik lo tih an sawi.