Mizoram sawrkarin SEDP hnuaia vaimim chi a sem atangin metric tonne 19085 thar a ni a, sawrkarin a leilet chu tun thlengin quintals 1094.61 a ni.
Assembly Session-a ZPM member Lalduhoma zawhna chhangin Agriculture minister C Lalrinsanga chuan, SEDP vaimim thar atanga sawrkarin a leilet sak hi, Serchhipa ran chaw herna bunah quintal 553 leiin, kg ah Rs.20 in a leisak a, Tanhrila ranchaw siamnaah kg. ah Rs.24 in quintal 541.42 leisak a ni bawk. Heng vaimim lei hi ranchaw siamna’na hman a ni tih a sawi.
SEDP hnuaiah vek hian vaimim nuaina khawl sawrkarin a ngaihtuah sak a, tangkai zawka an hman dan ngaihtuah chuan SEDP vaimim chi sem hi chhunzawm zel tlakah sawrkar chuan a ngai tih minister hian a sawi a. Phai atangin ranchaw tur vaimim, tlawm zawkin lei theih mah se, an enchhin tawnnaah tualchhunga tharchhuah ngei chu ranin an ngeih zawk tih an chian thu a sawi a ni.
Vaimim chingtute hlawk zawkna’n sawrkarin price support pawh mumal deuha kalpui theih an inbeisei hnai tih a sawi bawk.
Mizorama thar hmarcha, ‘Birds eye chili’ chu Mizoram thar ngei a ni tih tihchianna tur – ‘geographical indication’ an tifel tawh nia a hriat thu Agriculture minister hian a sawi a. United States-a hralh turin Mizoram tharchhuah metric tonne 7.5 vel chu buatsaih niin, hemi hma hian organic a ni ngei em tih Bangalore-a endik a ni a, tunhnai mai khan a result hi chhuakin, an duhdan a tling a, thawnchhuah turin buatsaih mek a ni tih a sawi.
SEDP vaimim thar MT 19000 atangin sawrkarin qt. 1094 lei
Get real time updates directly on you device, subscribe now.