LEHKHABU HLUTNA

By: Zoremi Hmar Zote
Khawvela ram changkang ber berte hi lehkhabu chhiar nasa hnam an ni deuh zel a, hna sâng leh ropui tak tak thawkte pawh tun dinhmun an thlen theihna kawng hmasa ber chu lehkhabu(zirlaibu)a ni. Mi thiam kan tih te, khawkhat pa ràwn kan tih leh vantlang ina kan chung en te reng rengin, an nihna hlawh chhuak tura an beihna kawnga a bulpui ber chu lehkhabu tha a ni. Tun lai khawvel finna zawng zawng hi lehkhabu atanga chhuak vek a ni ti ila, kan sawi sual awm lo ve.
Khawvelah hian lehkhabu hi awm lo ta se kan khawsak dan tur chu ngaihtuah ngam chi pawh a ni lovang. Finna leh thiamna te pawh lehkhabu awm lo se chuan mi pakhatah a tawp zel dawn tihna a ni a, a finna zar kan zo ve na tur lehkhabu-a a ziah loh miau chuan amahah a tawp háwl ringawt dawn tihna a ni a, mi dang hi chu kan mawl hlawm ngawt ang! Lehkhabu hi awm lo ta se chuan hmanlai chanchin(History)hriat ngaihna a awm lo ang a, Kristiante nun kaihruaitu leh rinna kawnga kan chaw pawimawh ber Bible pawh hi a awm dawn lo tihna a ni dawn a, ringtu pawh kan awm thei dawn em ni! Lehkhabu hi awm lo ta se chuan ram hrang leh ram hrang tawng kan inhre pawh lo ang a, kan buai hlawm viau ang. Tin, thil hlui emaw, tih dan tha inzirtirna bo/ral thei lo a ni bawk. =hangthar ten kan hriat phâk reng reng loh tur thil tam tak, tuan leh manga thil lo awm tawh pawh lehkhabu hmang hian kan lo hre ve thei ta chauh a ni. Lehkhabu ziaktu hian eng thil pawh ziak se, source tam tak atanga a lak khawm a ni a, chung thu, hlawm khata awm lehkhabu hi a hlu hle a ni. Lehkhabu hlutna hi sawi vek dawn chuan a tam lutuk, vawiinah chuan kan sawi zo seng dawn lo.
Mi ropui hrang hrang zingah keiina mi ropui ka tih ve chu lehkhabu ziaktute hi an ni. Ziak leh chhiar ka thiam tirh ata lehkhabu ka chhiar ve thin a, kan naupan ve laia lehkhabu lar deuh chu Tom Sawyer leh Sherlock Holmes, PL.Liandinga lehlin te, Robin Hood, cowboy bu leh detective lam bu te kha an ni a, M&B kha chu nula chhiar turah kan ngai deuh; love story, ‘Hlim ni kawl eng ve tak ang maw’ tih te kha kan tahpui tuau mai kha a ni a, tun lai angin internet leh social media te a la awm lo bawk nen, inawmtleina kha kan mamawh a, thawnthu ngaihnawm leh min awm tlei thei tur duh khan kan tuihal huam huam a ni ber a, lehkhabu ngaihnawm leh tha deuh chu kan inhawh kualsak nasa thei hle. Ka pa a zin pawhin naupang lawm eng eng emaw min hawnsak lovin, lehkhabu min hawn sak mai thin a, ka lungawi thin hle a ni.
Tunah chuan Internet khawvelah kan cheng tawh a, Tlevision, Phone leh Computer hmang tein kan inawm tlei a, lehkhabu chhiar peih kan tlem ta niin a lang; chutih rualin a chhiar peih pawh kan la tam hle tho tih a lanna chu Book Fest velah tlawhtu/dawrtu kan nei tam thin hle a, lehkhabu rawn lei zingah college zirlai an tam ber; thla an timuang a, a lawmawm tak meuh meuh a ni. =halaite hian lehkhabu chhiar hi intihhmuh se la, in chhungah nu leh pa ten kan fate hnenah lehkhabu chhiar thatna te sawi uar ila, lehkhabu chhiar turin fuih thin ila a hlawkna kan tel thuaiin a rinawm. Tun laia thalai leh naupang zawk ten Mizo tawng an thiam lo lutuk te pawh hi lehkhabu an chhiar tlem vang a ni tih hi dâwt a ni hauh lo.
Facebook lamah te, Youtube lamah te thu leh hla thiam tak tak an awm hlawm a, a bu law law-a tihchhuah atana it fe fe ka nei nual mai. Facebook lama ziah hi a tha lo ka ti miah lo va, a bu nge nge chu ro tling a ni zawk e ka ti deuh. Facebook te ngat phei chu chhiar pawh chhiar chhuak tha mang bar lovin like an pe a, an tuai liam puat a, a zo der! Thu leh hla thiam tak, likers ngah em em, comments hlawh hnem tak kha lo thi ta se, a wall-ah an ui thu an ziak ang a, a thu leh hla ziah ten like a hlawh belh nual ang a, comment lamah an ui thu an ziak kur nguai ang a, thla khat a ral chuan a chhungte leh thian thate bak tu khaw-kha hriat a hlawh tawh lovang. Tichuan a thiamna leh a hlutna chu a zo der ang. Chu tak chu a nia a bu-a chhuah a thatna leh lehkhabu hlutna chu. Lehkhabu te chu ral ve mai mai chi a ni lo va, a ziaktu thih hnu-ah pawh a lehkhabu hmangin mi thinlungah thu a la sawi reng ang a, a kut chhuak ten tute emaw lehkhabu bawm a la luah reng ang a, a chuai ve mai mai tawh dawn lo a ni. James Dokhuma te pawh a lehkhabu avangin a thih hnu-ah hlei hlei a ngaihsanawm zual zel a nih hi.
Kei ngei pawh hi facebook leh whatsApp lama thu ziak thin ka ni a, chu chu min uipuiin Pu Lalrammawia Ngente chuan min rawn zawng chhuak a, ka thu ziahte chu a buin kan siam ve ta a, ka lehkhabu hmasa ber atan ‘Chumchi leng’ chu kan tichhuak ve ta a, MAL book of the year top 3-ah hial a lang ve a, ka inchhir lovin min rawn zawng chhuaktu chungah ka lawm nawn awn awn mai asin. Facebook te, whatsApp te chu chhe thei a ni a, zan khat thilthu lekah kan thu leh hla ziak, ‘ka dah tha e’ kan tih ve pawh bo thei, chhe thei a ni tlat mai a, a bu ngeia awm hi a thain a hlu a ni. Vawiina he thu lo chhiar ve, thu leh hla lama tui leh thiam bawk in awm chuan, in thu leh hlate kha a bu ngeiin chhuah ve rawh u tiin ka chah duh cheu a ni. Sawi tak ang khian facebook leh whatsApp ringawt hi chu chhe thei, bo thei a ni a, in kut chhuakte a bu ngeia in dah chuan in inchhir ngai lovang. Hralhna a huphurhawm in tih pawhin copy 500 lek pawh a chhuttir theih a nia. Hralh sum atan ngawr ngawr chuan lehkhabu ziah hi(kan hralh hnem hle a nih loh chuan)a hlawk lem lo va, mahse kan kut chhuak thu leh hla dah that nan chuan a bu tluk a awm lo.