Mizoram Nil leh hi…

UPSC hnuaia Civil Services Exam result 2023-ah Mizoram kan nil leh ta a. India hmarchhak state dangte chuan a lo berah pakhat tal inziak tling an nei vek a. An tlin dan chu Assam-5, Nagaland-4, Manipur-4, Arunachal Pradesh-3, Meghalaya, Tripura, leh Sikkim ten pakhat theuh.
India hmarchhak state zinga development lama kan lo chung en lutuk loh thin Arunachal Pradesh atang chuan pathum ngawt mai an tling.
Mizoram atanga IAS tling hnuhnung ber nia hriat chu Grace Lalrindiki Pachuau a ni a, kum 2013 kha a ni a; khami hnu khan Mizoram atangin IAS (Regular recruitment)-a tling an la awm leh ta lo tihna a, kum 10 chhung kan nil ta tihna a ni.
Kan Nil rei ta lutuk hi kan vei tlang a, pawl thenkhat thahnemngai chuan All India Services emaw, Central Civil Services emawa inziak tling an awm ve theih nan sponsorship te an theh chhuak a, kohhran te pawhin an vei hial.
Sawrkar lam pawhin tan a la a, Mizoram Youth Commission kaltlangin hma a la a, sum leh pai pawh a seng ve viau. All India Services leh Central Services lama tui leh inziah tlin tumte tana lehkhabu tha chhiar tur chhawpchhuah dan tur te, thalaite zinga mi thiam bik te puala test buatsaih leh chuta tanga thlanchhuahte chu Coaching Centre thaa lut tura sponsor dan tur te an rel a, an kalpui mek a. Hei bakah hian Prelimimary examination-a inziak tlingte chu Main examination inbuatsaih tura sum leh paia tanpui chhunzawm zel ni se tih te an rel a ni. Tun tuma Main paltlang mi pahnihte pawh sawrkar hna chelh lai an ni chungin, exam hmachhawnna tura an inbuatsaihna atan ngaihhnathiamna zau tak a pe nghe nghe a nih kha; vanduaithlak takin interview an paltlang zo ta lo hlauh a, a pawi hle.
A ler lama thuai nghek hi kan kalphung a ni deuh ta em aw a tih theih. A grassroot level atanga ‘quality maintain’ hi a pawimawh a, kan education system te pawh hi enfiah deuh a ngai a ni maithei e.