Lei sei ber

Lei sei ber
Guinness World Records-in khawvela hmeichhe lei (tongue) sei ber title a pek lai chu California a cheng Canel Tapper a ni a, a lei a theih-pa-tawpa thuia a chhuahin, a hmui atanga tehin a lei hmawr thlengin 9.75cm (inches 3.8) a sei a ni a, mahse, ani aia lei sei zawk an awm tlat. Adrianne Lewis lei chu inches 4 (10.16 cm) a sei a ni tlat mai. Guinness World Records-in khawvela lei sei bera a puan lai Nick Stoeberl a lei pawh 10.1cm (inches 3.97) a sei niin, hei ai pawh hian Adrianne Lewis lei hi a la sei zawk! Mahse, Guinness World Records-ah a inziak lut ve tlat lo.
Adrianne Lewis hian Guinness lamin record siam tura tih tur neuh neuh an tuk te a puitlin hleithei lo a, chuvangin record bu-ah a hming a chuang ve thei ta lo a ni. Official-in khawvela lei sei ber ni lo mah se a sei ber tho tho!
Adrianne Lewis hian a kiu a liak thei a, a mit pawh a liak pha! Hetiang taka a lei a sei mai hi inthlahchhawn niin a ngai a, a nu leh a pi bakah a nu pu te pawh mipangngai aia lei sei zawk vek an ni. Tunah chuan a lei sei avang hian social media lamah follower a ngah phah viau a, mahse a naupan deuh lai chuan a lei sei lutuk avanga chhaih te pawh a lo tuar ve tawh thin.
“Elementary school ka kal laiin min chhaih nasa thin a. Ka lei ka chhuah khum vaka an hlau thin,” a ti.
Adrianne hian tleirawl kum 18 mi a nih lai, 2015 khan lei sei ber record siam tumin Guinness lam a be pawp ve tawh a. Mahse, Guinness lamin tih tur neuh neuh an tuk te a tipuitling thei lo va, record bu-ah a lang thei ta lo. Mahse, YouTube-a 60-Seconds Documentary atangin a lar tan ta a, ama pual YouTube channel siamin, a lei hmangin a thil tihtheih chi hrang hrang a phochhuak a, TV show hrang hrangah te pawh a inlan thin.
Adrianne hi a lar deuh hluai hnuah a an tawmbo ve leh deuh vang vang a, social media-a a larna chuan a nunah harsatna thlenin, social media comment tha lo a dawn chang a awm a, chu chuan a nun nghawngin, a tawm bo leh ta vang vang a, October 2021 khan Jay Leno show You Bet Your Life tihah inlanin a rawn lar thar leh ta a, heta tang hian social media a negative comment te pawh thlir liam dan a thiam ta zawk niin a sawi.