Mizoram sawrkar sum bat tam thu sawi rengtuten sawrkar tuma theihtawp an chhuah chuan sawrkar sum dinhmun a chhe lem lo tih a lantir thu MNF party chuan an sawi.
MNF Media & Publicity general secretary VL Krosshnehzova chuan Mizoram leiba chu GSDP percent-a chhutin a tam ber tih thu a lar viau laiin, state leiba hi a percent-a rulh tur a ni lo tih a sawi a. State pachhia leh thawhchhuah nei tlem Mizoramah sum dinhmun ropui beisei tur a awm lo, tiin, India rama state leiba nei tlem ber dawttu kan ni thei chu ropui a tih thu a sawi.
“Mizoram sawrkar sum bat dan hahipa sawi a, sawrkarna siam leh tute tan pawha huphurhawm ang hiala sawi thin tuten sawrkarna siam tuma tha tawp an chhuah thin hian, Mizoram sawrkar sum dinhmun chhiat lem loh zia a tarlang chiang hle,” a ti.
Hrileng avangin Mizoram chuan a sum hmuh tur cheng vaibelchhe 2632.58 a hmu lo chungin, dinhmun chhe lutuk loa Mizoram paltlang pui theitu chief minister Pu Zoramthanga kan nei chu vanneihthlak an tih thu a sawi a. Finance Commission rawtna angin state sawrkarin a duh zat zat sum a puk thei loh tih sawiin, an dinhmun mil tawk zela an puk thin thu a sawi. State sum lakluh tihpun zel a tul bakah sum hmanral tihtlem nan leh Finance Commission 15-na duhdanin Mizoram Resource Mobilization Committee din a ni a, an hmalakna in sawrkar sumbawmah cheng vbch. 35.74 a lut tawh tih a sawi a ni.
Mizoram sawrkarin sum chungchanga harsatna a tawh mek lak atanga phur chhuak turin MNF a inpeih reng tih VL Krosshnehzova hian sawiin, “Kan ram hian hun muanawm zawk leh remchang zawk a hmachhawn chhoh zel kan ring a. Sawrkarna chelh leh hi beidawnna nena thlir loin, huaisen takin Pathian leh kan ram tan ti tlat chungin kan inhuam reng a ni,” a ti.
Leiba tam thu sawituten sawrkar ve an chak – MNF
Get real time updates directly on you device, subscribe now.