January 26 zan khan Khawzawla kawng laih meka hnathawk hnamdang pathum chu leiminin chhilhin a hmunah hian an thi.
-- Advertisement --
Thudawn danin Ningani zan dar 7.30 khan Khawzawl Hermon Veng huamchhunga Haukhawthanga huan mawnga national highway 6 kawng laih hna Balaji Company-in a thawh mekah, kawng chhak lam lei tla thei veng tura ‘Breast wall’ siam laiin chhak lam lei hi nasa takin a min a, hnathawktu zinga pathum chu a delh zui a ni. Leiminin a delhte hi – Raten Mandal (20), Alok Mandal (26) leh Prem Kumar Mandal (33), West Bengal lam mi vek niin, hemi zan dar 9.15 velah an ruang hi lak chhuah kim a ni.
Chhiatna thlenna hmun hi Khawzawl district bawrhsap CC Lalchuangkima leh sawrkar mi dangten pan nghalin tih tur tul ang angte an ti a. Nunna chan mi pathumte ruang dahna tur kuang hi Sub Hqrs YMA Khawzawl chuan a ngaihtuah sak a, Khawzawl damdawi ina postmortem an nih hnu ah hemi zan la la hian an khaw lam panpui an ni.