Leivung leh bawlhhlawh paihna titawp turin ngen

Leivung leh bawlhhlawh paihna titawp turin ngen
Durtlang Leitan ram chhunga mimal rama Aizawl Municipal Corporation phalnaa leivung leh bawlhhlawh chi hrang hrang paih chuan Muanna Veng bakah Muthi lui leh Tuipawl lui tan harsatna a thlen nasa tih sawi a ni a. Hei hi tihtawp a nih loh chuan court leh National Green Tribunal-a kal tum a ni.
Muanna Veng YMA, MUP, MHIP Branch leh YMA Muthi Branch bakah Centre for Environment & Social Justice (CESJ) Mizoram chuan helai hmun hi kumin April 26 khan a hmunah an enfiah a. Leivung leh bawlhhlawh paih a ni a, bawlhhlawh hi thliar hran a ni loa, hal phalna hmu loin hal thin a ni tih an sawi.
Leivung leh bawlhhlawh hi a dangtu tur siam a nih loh avangin Muthi lui leh Tuipawl luiah hian a lut thla nasa hle tih an sawi bawk.
Heng avangte hian Aizawl district magistrate/ bawrhsap hnenah ziakin an duh an thlen a. Tih tawp nghal a nih loh chuan helaia bawlhhlawh leh leivung paih lirtheiin mi pahnih a sut hlum tawh bawk vangin Gauhati High Court Aizawl Bench-ah PIL thehluh an tum bakah helaia leivung leh bawlhhlawh paihin environment a tihchhiat nasat avangin National Green Tribunal-ah complaint thehluh an tum tih an sawi a ni.
Heng thilah hian Aizawl mayor hnenah leh Truck Owners Association hnena lehkha an lo thehluh tawhten awmzia a nei lo tih an sawi tel bawk.