Lengpui Airport pekna tur la tifel lo Indian Airforce lam buk a rit deuh

Lengpui Airport pekna tur la tifel lo
Indian Airforce lam buk a rit deuh
State sawrkar tana enkawl hautak tawha ngaih Lengpui Airport enkawlpuitu tur sawrkarin a dap mek a, thutlukna siam a la ni lo chungin, Indian Air Force buk a rit deuh nia ngaih a ni.
Chief minister Lalduhoma chuan Working Committee leh Indian Air Force (IAF) chu indawr zui zel tura tih a ni, tiin, “Thutlukna siam a la ni loa, kan pe ang kan ti thei loa, kan pe loang pawh kan ti thei lo. An indawr chhunzawm zel phawt dawn,” a ti.
Chief minister sawi danin, Lengpui Airport hi kum 20 kalta vel atang khan sawrkarin amaha enkawl ngawt chu zo loa hria in, a enkawltu tur an lo zawng tawh a. Sawrkar kalta in kum 2022 khan Airport Authority of India (AAI) kuta hlan tumin draft agreement an siam a, an final hman ta lo.
“Keini’n kan tih hmasak ber chu airport ram tihchian a ni. Airport ram hi tehthat apiangin a zim zel a, a huamchhungah mimal thenkhatin ram an lo insahthlak a, Revenue department-in a tira airport ram kha a teh tha in a chhinchhiah vek a, kan hung dawn,” a ti. Dan loa ram inpete hian an khin mai pawh huamin hma an la a, tun thlengin inkhin thawm erawh an la hre lo tih a sawi.
Sawrkar hmasa lam ngaihtuahna chu anni’n chhunzawmin, a enchiangtu tur Working Committee an din a. AAI an dawr zui a, mahse an ni duhdan hi pawm chi niin an hre lo tih a sawi a ni.
“AAI hian India ramah airport tam tak an enkawl a, an enkawl zawh loh avangin midang hnenah an outsource mek zel. An kutah dah ta ila, enkawl tak tak thei si loin midang kuta an hlanchhawn kan hlau a ni. A ram neitu nihna leh thildang a thlawna kan pek an phut a, dawr zui zel tlakah kan ngai lo,” Lalduhoma hian a ti.
Working Committee hian Indian Air Force (IAF) an dawr leh a, vawi 7 thukhawm tawhin a hmunah an en ho bawk a, an duh dan a tha khat viau niin a sawi. August 31 khan Working Committee hian an report an thehlut. Hei hi cabinet thukhawm chuan thlirhoin report hi an pawm a; chutihrualin IAF kuta hlan nghal tur tihna erawh a ni loa, la zirchiang zelin thuthlukna la siam leh tur a ni tih a sawi.
“IAF hi chuan a area insem an rawt a, runway chin lehlam zawng an chang anga, family quarters bakah a bulhnai mipui chhawr theihin damdawi in leh school thlengin din an tum. Terminal building lam chu state sawrkarin a la chang anga, operation zawng zawng a kal ngaiin a kal thei dawn. Kan enkawl tur chinah chuan sen belh loin hlep kan nei ve thei tura ngaih a ni a, a vaia pek tur a ni lo,” a ti.
Airport runway-in thlawhna lian leh rit a dawl zawh dan tehna – pavement classification number (PCN) ah Lengpui runway hi 36 a ni a, PCN 48 tala tihsan an duh a, chumi atan chuan cheng vaibelchhe 50 tal a ngai dawn tih a sawi. A khat tawkin thuamthat reng a ni a, vawikhat thuamthatna atan a tlem berah cheng vbch.25 vel a ngai tih a sawi bawk.
IAF-in an lak dawn chuan PCN 55 ah tal upgrade-in senso tum vek an inhuam a; Lengpui Airport-a instrument landing system category-I hman mek pawh pilot-ten chhum a chhah deuh tuma an tum ngam loh fo avangin category-II a tihsan a tul hle a, hetah pawh hian cheng vaibelchhe tam a ngai leh a; IAF chuan an ti thei mai dawn tih a sawi a ni.
SEDP leh SASCI atanga airport thawmthatna atan sawrkarin a seng hnem tawh lutuk a, Kamrul-a bill pek tur ringawt pawh huphurhawm khawp a ni tih chief minister hian a sawi.