Lengpui ram hralhah CBI-in preliminary inquiry ti mek – MNF Legal Board chairman
Lengpui ram hralh chungchangah CBI–in preliminary inquiry an ti mek a, Lok Ayukta pawhin a bawhzui zel tih MNF Legal Board chairman C Lalramzauva chuan a sawi.
Zirtawpnia Mizo Hnam Runa inkhawmah MNF Legal Board chairman hian, 2017 atanga Zo Carbon chungchanga MNF Legal Board hmalaknaah hnehna chan a ni ta tih a sawi a. Lengpui ram hralh chungchangah MNF Legal Board hminga thu thehluh kalzelah CBI-in preliminary inquiry a ti mek a, Lok Ayukta pawhin a bawhzui zel tih a sawi.
Mizo nationalism chu Mizote rilrua riak reng a ni a, India rama state pakhat ni mah ila, nation khatah kan inchhiar a, 1986 hmalamah Mizo nationalism movement nasa takin a lo kal tawh a. Hnam anga dingchhuak turin engkim huamin mi hmasaten theihtawp an lo chhuah tawh a. Hun a kal zel a, remna a lo thleng ta a. Ralthuam hmanga inbeihna chu a lo chawl ta tih a sawi a ni.
Tunlai khawvela ram tana ngaihtuahna senga che vel mekte chu 1986 – 2006 inkara piang, an hmalam hun hre mumal lo, Zofaten harsatna tam tak kan paltlang tawh a taka tem ve lemlo an ni tih C Lalramzauva hian sawiin, “Ram leh hnam tan theihtawp chhuah an inhuamna erawh a fakawm hle. An rilrua riak nationalism chu Mizo nationalism huangchhunga nasa zawka an pen theih a duhawm hle a, an thiam leh finna, theihna hmanga hruaitu hmasate thawhrim rah chunga chuang an nih inhriain, hun lokal zel turah nasa lehzuala an pen a duhawm. Zirna hmasawnna tura sawrkar kal tawhte sulhnu chhuia dikna leh rinawmna nen kan ram hian kan thalaite tuihalna fah tura hma a sawn zel a pawimawh a ni,” a ti.
Sawrkar kal mek hian zirna tih changtlun kawngah a hnungtawlh zawng ni lo, hmasawn zawnga a pen a tul tih MNF hruaitu hian a sawi a. Adhoc grant-in- aid school thil beisei pawh ngaihtuah sak a, harsa tak kara sawrkar hmasaten thawhrimna nen zirtirtu tam tak an lo lak tawh leh school tam tak dinhmun sang zawka hlankai kha a titawp zawng ni loa, an chhunzawm zel a tul a, sawrkar a ngen tih a sawi a ni.
“Kan thalai rualte hian, kan nationalism chhem alh turin hnamdangte aiin zirna kawngah kan tithain, kan sang zawk tur a ni, tih hi an vawn tlat a, an beih ngat ngat a tul. Chu chu ram hmangaihna thinlung nena kan ram leh hnam tana an tih theih sang ber zing ami a ni,” a ti.