Lengpuia damdawi hmun tlawh

Lengpuia damdawi hmun tlawh
Sawrkar thil pawimawh tia Delhi-a kal Health minister Dr R Lalthangliana chuan a zin haw lamah Inrinni khan Lengpui Airport MI room, Lengpui damdawi in leh Sub Centre tlawhin an mamawh a enfiah.
Lengpui Airport MI Room hi ram dang khualzinte tan a pawimawh bik avangin G-20 avanga an lo cheitha chu lawmawm a tih thu minister hian a sawi a. Tihchangtlun zel a ngaih thu leh an mamawh leh thil tulte chu a hnenah thlen a, a theih anga puih zel a tum thu a hrilh.
Lengpui damdawi in leh Lengpui Health Sub-Centre a tlawhnaah, damdawi in hi Covid len lai atang tawha khualzinte tan Mizoramin a chhawr tangkai em em a ni, tiin, nakinah eng hri emaw leng leh thei a ni a, Mizoram tan khualchhawn damdawi in pawimawh tak a ni tih a sawi. Staffs quarter sakthat ngaite enin hma lak zel a tum thu a hrilh a. Damdawi in mamawh hrang hrang chu a hnena thlen zel turin a hrilh. Hemi bula Isolation Ward sak mek chu en nghalin thawktute hnenah tha leh rinawm thei ang bera thawk turin a chah a, tuna an sak mek chin chu an sakthat avangin lawmthu a sawi a ni.