Lenny Kravitz Hollywood Walk of Fame ceremony-ah a fanuin a roast

Niminpiah khan Lenny Kravitz puala Hollywood Walk of Fame-a arsi hawnna an nei a, he ceremony-ah hian Lenny hi a fanu, actress Zoe Kravitz-i’n a kap ve hlak. Zoe hian thu sawiin, a bul tanna lam chu a bei thlum viau a, “I fanu ka ni ka nuna thil hlimawm ber te zinga mi a ni,” a ti a, a tawp lamah inchei thin dan chu fiamthu nan a hmang zui ve zauh a ni.
Zoe hi Lenny leh a ex Lisa Bonet te inkara piang a ni a, a fanu a pian hian Lenny chu kum 24 mi a ni. Tunah chuan Zoe pawh kum 35 mi a ni tawh a, Zoe chuan, “Kawng hrang hrangah kan seilian dun a ni ber mai. Thil tam tak kan tawng tawh a. Tam tak kan hmu tawh a. Tam tak ka hmu tawh bawk. A duhawm zawnga i inthlak danglamna ka hmu a, i thatna inthlak danglam ve lo tam tak pawh ka hmu,” a ti bawk.
Chutah Zoe chuan a pa inchei duh thin dan, thawmhnaw tawngchham tak tak a hak thin chu fiamthu thawh nana hmangin, “I hmangaih te i enkawl thin dan te pawh ka hmu a, i thiamthil tana i inpekna leh tihtak takna te pawh ka hmu tawh, tichuan, i kawr te pawh ka hmu tlang vek tawh. Ka pa hian a tia lawm, i hnute hmur a lan loh chuan kawr a ni lo,” a ti.
Zo chuan a pa inchei thin dan chu concert leh award show vel atan chuan a tha viau a, mahse, a school kal laia chutianga inthuam chunga a hruai thin chu a zak ru ve deuh thin niin a sawi a, “Mahse, tunah chuan ka zahpui tawh lo. I inhmeh viau zel e. Kawrphiar i ngainatna hi chu i relationship neih ve tawha daih rei ber a ni chiang mai, a tha viau e,” a ti bawk.