LESDE MBBA Inter Veng 2025Super Saturday – Aizawl Veng lian inlan ni
LESDE MBBA Inter Veng 2025
Super Saturday – Aizawl Veng lian inlan ni
MBBA buatsaih LESDE Inter Veng (LC/VC) chu R. Dengthuama Indoor Stadium, Salem Vengah a ni thumna vawiin hian khelh chhunzawm a ni dawn a, MSL club nei veng pahnih Mission Veng leh Zemabawk inkhel tur hi a hmuna inkhel en chhan tlak a tling ang.
Kum 2010-a Inter Veng champion Mission Vengah hian MSL lamah pawh star player ni pha Thianga a awm a, coach tha Ahruaia’n he team hi a kaihruai thei cheu.
Zemabawk hi an venga basketball tinungtute zinga hming lam hmaih thiang lo Ricky-a hovin an rawn thawkchhuak dawn bawk.
Kum 2015 leh 2023-a khua/veng intihsiaknaa champion Ramhlun North leh team tha ber pawl ni thei reng Kanan veng inkhel tur hi a nghahhlehawm.
Ramhlun North tan an star player thin Michael F-te ho vanglai a pel tawh a, kum lama naupang zawkte thlen theih chin a hriat ang.
Kanan tan pawh an star player thin Liamate chuai deuh tawh mah se MSL lamah pawh an theihna sanzia kan lo hmuh fo tawh Kanan veng tan innghah ngamna Rozamate unau leh Fka-te’n an vanglai hun tha an hmang mek thung!
Aizawl Venglai leh Leitan Veng intum tur hi basketball hruaitu tha nei veng an ni a; ADBBA hruaitu Terry-a leh MBBA president Puiate vengah hian player theihna nei tha inphumte phochhuah ni a ni thung ang!
Kum 2013 leh 2018-a Inter Veng champion Dawrpui Vengthar hian Nuna leh Rinate vanglai pelh hnuah tunge team khaichhuak thei tih fiahna an paltlang dawn a; an elpui tur ADBBA lama an boss Bsa-te veng Chaltlangah Samson-a hian thlawptu a neih that leh that loh a lang bawk ang.
Zan lama inkhel tur Tuikhuahtlang leh Armed Veng hi Mizoram basketball phek hlui lama hniak hraw lo nei tatha fal nalh Lalrina Renthleiin hliam a neih avangin a inlan thei dawn lo a; Lsa-te tan hna a hautak phah ang.
Armed Veng hi an veteran player pahnih Chpa leh Dave-a te’n an uap dawn a, naupang zawk Rinpuia leh tawnhriat ngah tawhte hi an thawhho that a tul thung ang.
Kum 2015 leh 2018-a an venga veng/khua intihsiakna champion trophy hawn thei Khatla South coach Dennis-a tan hian Thakthing hi paltlang an harsat a rinawm loh!
ADBBA buatsaih Mayor’s Cup champion ni bawk Khatla South hi tun inelnaa champion beiseiawm ber pawl an ni a, an veteran player Gospel-a khel thei tur hi MSL star player ni phak Ropuia leh Hmachhuana te ho tan hian thlamuanpui tham a ni.
Pressure awm miah lova khel tur Thakthing tan hian Inter Veng 2025 chawlhkar khatnaa match tawp ber hi team lian barakhaihna’n erawh hun duhthusam a ni.
July ni 3 zan inkhel result
Luangmual 64-78 Chawnpui
Vaivakawn 83-80 Venghlui
Zirtawpni inkhel result
Republic 64-55 Mission Vengthlang
Dawrpui 78-92 Hunthar
Ramhlun Sports Complex
26-65 Champhai Kahrawt
Ramhlun Venglai 77-61 Falkland
Tuikual North-Zonuam (Result hre hman lo)
Saron-Nursery (Result hre hman lo)
Vawiin (Inrinnini) inkhel tur
Mission Veng vs Zemabawk 10am
Ramhlun North vs Kanan 11:45am
Aizawl Venglai vs Leitan 2pm
Dawrpui Vengthar vs Chaltlang 3:45pm
Tuikhuahtlang vs Armed Veng 6:15pm
Khatla South vs Thakthing 8pm