Mizoram State Disaster Management Authority (SDMA) leh National Disaster Management Authority (NDMA) tangdun huaihawtin Ningani khan state pum huapin lirnghin thlen thulha chet lak dan tur a tak ang thei bera enchhin a ni a. Aizawl khawpui hmun thlan bikah pawh mock exercise hi neih niin, district headquarters-ah pawh hmun thlanbikah neih a ni.
-- Advertisement --
Aizawla mock drill atan hian National Disaster Response Force (NDRF) 1st Battalion Guwahati atangin an rawn tel a, Assam Rifles leh Central YMA bakah local council thenkhatte an tel bawk.
Chawhma dar 10.00 ah lirnghing richter scale 8.7-a na a thawk anga tan niin, lirnghinna hmun (epicentre) hi Champhai atanga intan anga ruahman a ni. Aizawl bawrhsap pisa-a District Emergency Operation Centre (DEOC) ah Incident Response Team member-te an tlankhawm nghal a. Aizawl DEOC-ah lir nghin thu hriat a nih veleh ralkhel dar (siren) tihrik a ni a. DEOC atang hian Aizawl DDMA chairman, bawrhsap Dr Lalhriatzuali Ralte hoin chhiatrupna thlen thulha mawhphurtu hrang hrang – NDRF, State DRF, Assam Rifles, Mizoram Police, Fire & Emergency Services, H&FW, MPRO, Quick Response Team, Traffic Police, PHE, Power & Electricity, LC leh YMA ah te chhiatna thlenna hmun leh thlen dan hriattir an ni a. Chhanchhuaktu chechhuak hmasa pawlte tirh chhuahna hmunpui atan MINECO Open Gym bul tualzawl hman a ni.
Govt. JL HSS, New Market building, Tuikual North lung tohlawt bul, RD Directorate leh Civil Hospital Aizawl casualty-te chu lirnghing avanga hliam tuarte chhanchhuah hna leh nunna chante lakchhuah hna thawhna atan hman niin, Civil Hospital leh Agape Hospital Chanmari chu emergency makeshift hospital atan hman a ni a. Lirnghing vanga chhiatna chi hrang hrang thleng thei – kangmei, leimin, in chim adt. atanga chhan ngaite chhanchhuah dan tur chu mawhphurhtu hrang hrang ruatten a tak ang thei berin an thawk a ni.
Aizawl DDMA chairman, MPRO team Incident Response System (IRS) hnuaia mawhphurtu dangten DEOC hi an thutchilh a. Incident commander ruatsa ten chhiatna thlen dan, thi leh hliam tuar zat leh a tul apiang a khat tawkin an hriattir reng a. Inbiakpawhna chi hrang hrang – internet, mobile tower adt a hman theih loh avang leh power supply a awm loh avangin mipui hnena thlamuanna thu leh chanchin tharlam hrilhhriat theihna awmchhun All India Radio kaltlangin darkar khat danah chanchin update thin a ni bawk.
District headquarters tinah pawh hmun thlan bik neiin hetiang deuh bawk hian mock drill hi neih vek a ni.