Liverpool an chak nuamsa

Ninga zan khan UEFA Europa League group Stage khelh chhunzawm a ni a, champion tura rinkai Liverpool chuan Anfield-a an mikhual Toulouse chu 5-1 in an hneh a, vawi thum chak zawnin an hmahruaina an sawh nghet. Inkhel dangah season liam taa finalist AS Roma chuan si hnih faiin an mikhual Slavia Prague an hneh. Roma tana goal thuntu Romelu Lukaku chuan Europa League match 14 zetah goal a thun zawn.
Reds an chak nuamsa
Premier League club lian Liverpool hian Anfield-ah an group-a pahnihna luah mektu Toulouse an mikhual a, an hmahruaina sawh nghet turin nuamsa takin hnehna an chang.
Reds hian an mikhual Toulouse lakah bul an tan tha viau a, goal an thun hma hle. Inkhel tan atanga minute kuana lekah Diogo Jota chuan Comez siamsak atangin hmahruaina goal a thun. An mualah hma taka goal an thun vangin phur viau mah se rin loh takin goal an chhuah zui thuai a, hma an hruai rei thei bik lo. Team lian taka goal chhuah thuai Toulouse hian fuh takin an khingpuite an nawr tlang a. Minute 16-naah Thijs Dallinga chuan goal thunin an si phurh a sut. An si phurh sut bawk mah se Ligue 1 club in Liverpool an chhaihkawlh a ni lek fang a, goal li ngawt an chhuah belh.
Goal tam zawk thun ngei tuma tan khawh Liverpool tan Wataru Endo chuan minute 30-naah Alexander-Arnold siamsak atangin hma an hruai nawn lehna goal a thun. Hma an hruai nawn leh hnuin an khel tha zui viau a. Endo goal thun atanga minute li hnu lekah Darwin Núñez chuan Jones siamsak atangin an goal thumna a thun zui leh nghal zat. Na takin an khingpuite nawr bawk mah se Reds hian chawlhlawk hmain goal dang an thun belh thei bik lova, 3-1 a hmahruai chungin chawlhlawk an hmang.
Chawlhlawk hnu lamah Liverpool an khel tha chhunzawm a, goal hnih an thun belh leh. Minute 65-naah Ryan Gravenberch chuan an goal thumna a thun a. Hun pek belh minute 90+3-ah Mohamed Salah chuan an goal lina a thun zui leh a, an mualah nuamsa taka hnehna changin, point thum an hmuh belh.
Europa League 2023-24-ah Liverpool an khel tha tluang viau a, vawi thum an chak zawn tawh. Reds hian point kua hmuin hma an hruai fal a, an hnuai chiaha awm Toulouse nen an inkarah point nga a tla zep mek. Group E-a inkhel dangah Union St.-Gilloise chuan an mikhual LASK Linz chu 2-1 in an hneh a, point thum hlu tak an hmu.
Union St.-Gilloise hian an mualah goal chhuah hmasa in hun rei tak chhung si an phur. Minute 24-naa Moses Uso goal thun an sut theih loh reng hnuin hun tawp dawn hnaiah an che fuh ta hlauh a, penalty an hmu. Penalty an hmuh hi minute 84-naah Cameron Puertas chuan a pet goal a, an si phurh a sut. 1-1 a nih hnuin an khel tha chhunzawm viau a, hun pek belh minute 90+4-ah Christian Burgess chuan hma an hruai letna goal a thun a. He goal hmang hian hnehna hlu tak an chang zui ta a ni.
Roma leh Lukaku an kal zel
Ningani zana inkhel dangah Group G hmahruaitu AS Roma chuan Olimpico-a an mikhual Slavia Prague chu 2-0in an hneh. He inkhel hmuhnawm takah hian Roma forward Romelu Lukaku chuan an goal a thun a. Belgium forward Lukaku hian Europa League-ah khelh 14 chhung zet goal a thun zawn tawh a. Roma pawh hi season tharah Europa League ah an la chak vek bawk.
Jose Mourinho enkawl Roma hian an mualah bul an tan tha hle a, inkhel tan atanga minute khatna lekah Edoardo Bove chuan hmahruaina goal a thun nghal a. Khelh 13 chhung goal thun zawn tawh Romelu Lukaku chuan minute 17-naah an goal hnihna a thun zui ve leh bawk. Minute 17 chhung leka goal hnih an thun hi an chakpui a, point thum an hmuh belh leh ta a ni.
Roma leh Slavia Prague te hi group hmahruaitu nih inchuha inkhel an ni a, vawi hnih chak zawn tawh ve ve an ni. An elpui lian lakah an chak vangin Roma hian point kua hmuin hma an hruai a. An hnuai chiahah Slavia Prague hi point ruk hmuin an awm a. Servette leh Sheriff Tiraspol ten point khat ve ve an hmu mek bawk. Season liam taa finalist Roma hian group stage an pal tlang ngei hmel.
West Ham an chak lo
Liverpool an chak laiin London club West Ham United chu Olympiacos lakah 2-1 in an tlawm. Tlawm mah se Hammers hian Group A-ah hma an hruai chhunzawm tho thung. Olympiacos tan hian Kostas Fortounis leh Rodinei ten goal an thun a, Hammers goal neih chhun hi minute 87-naa Lucas Paquetá thun a ni.