Liverpool an tlawm leh tawh

March 11, inrinni zan khan English Premier League 2022-23 khelh chhunzawm a ni a, team lian Liverpool chu AFC Bournmouth lakah si khat faiin an tlawm. Bournemouth lakah penalty a thelh vangin Mohamed Salah-a’n sawisel a hlawh a, ‘hero to zero’ tia a chungchang sawi zuina a tam hle.
English club ropui Liverpool hian 7-0 ngawt an hmelma lian Manchester United an sawp vangin hun hlimawm tak an hmang a, a puja fuh chho hle. United lakah 7-0 ngawta chak thei an nih vangin inrintawkna sang tak an nei thar a, top 4 huang luah phak beiseina sang zawk an nei thar bawk. Reds hi beiseina sang tak nen Vitality Stadium-ah an lenglut a, AFC Bournemouth hneh lovin an tlawm ta ringawt thung.
EPL-a an khelh hnuhnung berah Arsenal lakah uiawm taka tlawm AFC Bournemouth hian an mikhual Liverpool lakah bul an tan tha lova, goal an chhuah nghak teuh hle. Alexander Arnold coner pet tha zet mai chu Virgil van Dijk chuan tha zetin a tauh a, goal ngei tura ngaih a nih laiin Bournemouth player Lerma chuan a lo tauh chhuak hman hlauh a, an team a chhanhim. Vanneihthlak taka an him hnu lawkin Bournemouth hian goal thun theihna hun tha an nei ve nghal zat. Fuh zeta an khingpuite an nawr tlang hnuin Dango Ouattara chuan thui tak a khalh a, si nghak Alisson Becker a bum leh zet hnuin goal zawnah a pet thei lova, uiawm takin an hun tha an hlah. An him hlauh hnuin Liverpool hian goal an thun zui nghal thuai a, tunhnaia chetha tak Gody Gakpo chuan chiang zetin a pet goal naa, offside vangin he goal hi hnawl a ni thung.
Hun tha inhlah chhawk zak zak hnuin mualneitu AFC Bournemouth in goal an thun ta nge nge. Minute 28-naah EPL-a goal rang ber pahnihna Philip Billing chuan Ouattara siam tha tak chu awlsam takin a pet goal a, hmahruaina goal thunin an mikhualte an barakhaih.
Minute 28-naa goal an chhuah hi sut ngei tumin Liverpool in tan an khawh zui chiam a, hun tha nei bawk thin mahse an si phurh an sut thei lo. Chawlhlawk hmain Van Dijk chuan uiawm takin goal pawnah a tauh a. Chawlhlawk hnu lamah Diogo Jota pet tha tak chu si nghak Neto chuan tha zetin a dang bawk. Reds hian hun tawp dawn hnaihah an si phurh sut theihna hun tha zet mai an nei a, handball vangin penalty an hlawhchhuak. Penalty an hlawhchhuah hi Liverpool tan EPL-a goal thun hnem ber Mohamed Salah chuan a pet a, goal chhungah pet lut lo vin Salah hian chiang takin a hlah a, hun hlu a hlah. Penalty an thelh hnu hian hun tha an nei zui tawh lova, Vitality Stadium-ah uiawm takin an tlawm zui ta a ni.
AFC Bournemouth lakah uiawm taka an tlawm vangin Liverpool hian palinaah inhlankai theihna hun an neih hmasak an hloh a, point 42 hmuin pangnaah an awm chhunzawm. Team lian Liverpool lakah point thum hlu tak an hmuh vangin Bournemouth in him theih beiseina sang zawk an nei a. A him chin 17-naah awm mekin Cherries hian him tlang tumin thapui an thawh zui ang.