Lo hal bansan award

Kum a thar a, boruak thianghlim leh tuihna siamtu thing leh mau tam tak chu thingtlang loneituten buh chinna hmun atan an vat eng duai duai leh dawn a. Heng thing leh mau tam tak hi ni saah pho char a ni ang a, chu chu March ni 15 hmain hal zawh fel vek hman tur tiin sawrkarin loneitute a hriattir leh ang a; chu chu kan kum tin kalphung a ni.

He lo hal hun tur urlawk hian district tin bawrhsapte chu, an bial chhunga lo hal avanga ram kang tur ven dan tur ngaihtuahin tun atangin an hmanhlel leh tan tawh a. Fire Prevention Week hman dan tur an ruahman leh mek a. Ram kang tur veng tha tan lawmman “Village Level Fire Prevention Award” te an siam leh dawn a. Hei hi ram kang tur venna hmanrua pawimawh tak pakhatah kan ngai thin a; a nihna chin a awm bawk ang.

I han ngaihtuah chiang chhin teh ang: Mahni compound chhunga thing leh mau tana hmunah bahra chin duh avangin thing leh maute chu vat thluin hal ta hluah mai ila. Compound chhunga meiin a kan kai theih tur thildang veng turin chhungkaw member-te inpuahchah chiam zel mai ila. Mahni duty-na zawna kangmeiin a hliau kai tur lo veng him tha apiang kha chhungkaw pa berin lawmman pe thin ta se, chutiang nen chuan tuna kan kalphung hi a inzawl tawk viauin a rinawm.

Khawvelin a buaipui luai luai global warming awmzia kan hre tawh a, a chhan pawh a takin kan tawng mek. Tuihna vawng\hatu thing leh mau pawimawhzia kan hre bawk; mahse tuihna kangchat mek avangin thalah tui harsatna a thleng chho tan a, a takin kan tawng mek bawk. Tuihna a kangchat chhan hi khawilai lui hnar lama thing leh mau lo suasam chauh kha a ni mai lo; kum tina thingtlang lo neih avanga thing leh mau a maktaduai tel kan vah thluk reng vang hi a ni. Chumi kan hal kan avanga ram dang kang tur lo ven leh ringawt kha a changkang lo a ni. Thingtlang lo neih bansan a, eizawnna danga pakkaite dawmkanna tur lam ‘Award’ hi kan ngaihtuah a ngai a ni ber tawh e.