LoC-ah sipai a ri, kap fuh nualah India a inchhal
LoC-ah sipai a ri, kap fuh nualah India a inchhal
Pakistani sipaite chuan Poonch district, Jammu & Kashmir-a Line of Control (LoC) hrulah Nilaini khan inkahhai puan mek bawhchhiain Indian duty-na tiralkhelin silai an hmet puak a, Indian Army-in an chhan letnaah an inhloh nual niin venhim hna thawktuten an sawi.
Pakistan tawrh dan kimchang hi hriat theih a la ni lo va; mahse, an ‘inchân nasa’ niin India lamah chuan sawi a ni a, Indian Army-in engmah an la sawi lo thung.
Pakistan-in Krishna Ghati sector-a inkahhai an bawhchhiat hma ni chiah hian LoC hrul tho, Akhnoor sector, Jammu district-ah mi firfiakte tih ngei nia hriatin improvised explosive device (IED) puakah captain telin Indian Army pahnih an thi.
February 25, 2021-a India leh Pakistan hian inkahhai inremna an siam hnua LoC-a bawhchhiatna hi a thleng khât hle.
Thuneitute chuan Pakistani sipaite hian LoC hrula Tarkundi huam chhunga sipaite awmna bulah silai an hmet puak niin an sawi a, hei hi Indian Army hian an chhang let ve ta a ni.
A hun leh ni hriat loh video pakhat, Pakistani army officer vuina chu social media-ah a darh zui nasa hle bawk.
Hetih lai hian thuneitute chuan Indian Army-a junior commissioned officer (JCO) chu Nilaini tlai khan helai velah tho hian rahpuah bomb a rah palh avangin a inhliam tih an sawi.
Mendhar-a cheng JCO hi LoC-a firfiak ramri kân tum venga patrolling party zinga mi a ni a, sipai damdawi inah dah nghal a ni.
Kar liam taah ramri chhehvelah hian boruak eng eng emaw a awm avangin LoC hrul hi boruak a tang ru hle bawk niin an sawi.
Tun tum hi kumina inkahhai bawhchhiat a thlen vawi khatna a ni a, ni nga chhunga ramria inkahna a thlen vawi lina a ni thung.
Thawhtanni khan Kalal, Nowshera sector, Rajouri district-ah ramri lehlam atanga silai kahin sipai pakhat a fuh a. February 8 khan LoC hrula army patrol chu Jeri sector, Rajouri-ah ram ngaw atangin kah an ni tawh a. Mi firfiakte hian Pakistan atanga India-a luh ruk dan an dap reng a ni.
February 4 leh 5 zan khan India lam LoC hrul, Krishna Ghati sector, Poonch district-ah rahpuah bomb tihpuahah mi firfiakten hliam an tuar bawk.
February 10 khan Jammu-a awm White Knight Corps General Officer Commanding Lieutenant General Navin Sachdeva chuan LoC hrul, Rajouri district-a venhimna dinhmun thlirin thutkhawm a lo ko tawh.