Luah zui tlak lohin bangla kalsan – ZPM Thalai

Sawrkar kaltaa minister leh speaker ten bangla an zuah luh cheithat loha luah zui theih loh a awm nual avangin heng hi cheithat a ni tih ZPM Thalai chuan an sawi.
ZPM Thalai Hqrs. thuchhuak chuan, bangla cheithat chungchanga thudik chanve hmanga sawrkar beihna tih darh chu sawrkar hmasa mawng hlimnaah a ngai tih a sawi a. RTI chhannaa minister pathum leh speaker bangla cheithat nan cheng nuai 27.4 hman chu, en mai chuan tam tak angin lang mah se, bangla luah hmasatuten sawrkar bangla anmahni ta anga an enkawl loh avangin a chhe hlawm hle a, cheithat nasat a ngai a, hetiang zat sum sen a ni hi a tlem zawk hle tih a sawi.
‘Minister bangla-te hi a chhung luh reng rengin a chul rup a, repair ngai tam tak awmin, hengte hi siamthat vek a ni. A bul vel a hnimin a hnawk em em a, a chhung leh a bul vel cheithat nan ringawt pawh thla khat chuang hun hman niin, a chhunga bungraw awm tamtak hman zui tlak loh a awm nual a, bungrua hman tlak loh chu lak chhuah vek niin, bangla pakhatah phei chuan hmantlak loh sofa, thut zawng pawha spring tlum thuih thuih ang chi chauh dah a ni. A chhung bungraw awm zawng zawng, parda thlengin lei vek a ngai a. Heti khawpa bangla cheithat ngaite tha taka chei a ni leh, a chhunga bungraw awm zawng zawng lei vek a nih hnuah pawh cheng nuai 27.4 chauh sen a ni hi a tlem hle zawk a ni,’ a ti.
Tuna bangla cheithat tak minister-te chu term dang awm turah vanduaiin lo minister zui lo pawh ni se, heng an bungraw awmsa hi minister dang, bangla luahtu turte tan an chhawm leh nghal vek thei dawn tih a sawi a. An mimal tana bungraw lei pakhatmah a awm loa, bangla luah hmasatute ang lo takin an in lama hman turin an la ve dawn lo niin a sawi.
‘Sawrkarin bangla cheina atana cheng nuai 10 theuh a dah laia hetiang zat lek hman a nih piahlamah, an bungraw lei sa pawh a luah leh turten an chhawm lehzel tur hi lawmawm kan ti hle a ni,’ ZPM Thalai thuchhuak chuan a ti.
Tunhnaiah RTI-a zawhna chhannaah, November 2023 hnulamah bangla cheithat panga a awm a. Luahluttu leh bangla chei nana an sum senso tarlan chu – Tuikhuahtlanga speaker bangla chei nan Rs. 8,40,000; minister Lalrinpuii luah bangla chei nan Rs. 7,50,000; deputy speaker Lalfamkima luah lai bangla chei nan Rs. 6,50,000 leh minister C Lalsawivunga bangla luah lai chei nan Rs. 5,00,000 hman a ni a, a vaiin Rs. 27,40,000 a ni. A cheithatna sum hi Maintenance of Government Bulding Fund atanga hman a ni tia chhan a ni.