Langkaih lui fintu Borai lui chu tunhnai khan hrai a ni a, police-ah report a nih angin chhuizui mek a ni.
-- Advertisement --
The Aizawl Post thudawn danin, Kawrthah atanga Zawlnuam leh a chhehvel thlenga luang Borai lui hi kumin January 30 khan hrai a ni a, hrai a nih thu hi January 31 khan hriatchhuah a ni. Lui hraitute hian eng tûr/ damdawi nge an hman tih hriat a ni mai loa, a fan chin hi km. khat leh a chanve chin vel a ni. Thal lai a nih avangin tui luang a chak tawh loa, tûr hian a fan rei hle a, lui sa hi tun thlengin an la thih belh nia sawi a ni.
Lui hraina lai hi YMA Zawlnuam Borai Branch-in Fisheries department hriatpuia an humhalhna lai a ni a, kum hnih kalta vel atanga an humhalh tawh a ni. Hrai a ni tih hi luisa thi an hmuh atanga hriatchhuah a ni a, Borai YMA hian luisa thi an hmuh hi an theih ang ang chhawrkhawmin leiah an phum vek a, an chharkhawm chin pawh hi quintal khat a chuang tawh nia thu dawn a ni.
Lui humhalh a nih mai bakah he lui hi chhungkaw 50 velin an tlan lai a ni a, tunah hian tui pawh pump ngam a ni rih loa, Borai leh a chhehvel khua chuan an thinrim hle tih thu dawn a ni.
Borai YMA hian Zawlnuam Police Station-ah lui hraitu zawngchhuaka hma laksak turin FIR an thehlut tawh a. Police-te hian luisa thi leh a lui tui sample hi la tawhin, laboratory lama enchian turin an thawn a, lui hraitu ni thei awmte an chhui zui mek bawk.
Kar kalta khan Phulpui leh Baktawng ram inkara luang Tuirial lui chu tûr hmanga hrai a lo ni tawh bawk a, luisa engemawzat an thih phah a ni. He thilah hian Save Mizoram Rivers leh Mizoram Zoological Society aiawhte chuan Kulikawn Police Station ah FIR an thehlut a, police-te hian thuzawhfiah lakte pawh an nei tawh nia hriat a ni.