Lunglei – Tlabung kawng siam dan enfiah

Lunglei – Tlabung kawng siam dan enfiah
Lunglei district bawrhsap ruahmannaa din Inspection Team chuan Zirtawpni khan Lunglei leh Tlabung inkar National Highway-302 kawngpui laih zauh hna thawh mek dinhmun an enfiah.
Inspection Team hi additional DC, Competent Authority for Land Acquisition (CALA) Rochuangkimi Khenglawt chuan hoin, Tlabung SDO (Civil) leh Lungsen BDO, I&PR, PWD leh DC office LA Branch officials, Sub-Hqrs YMA Lunglei hruaitute leh NH-302 Ngaihven Pawl an tel.
He kawngpui zauh hna thawh mek enkawltu National Highways & Infrastructure Development Corporation Limited (NHIDCL) hotute leh hna thawktu contractor-ten lo dawngsawngin, hnathawh mek dinhmun leh hmachhawp an lo hrilhfiah a. Kawng laih hna leh kawng luan hna thawh mek dinhmun, leivung paihna hmun, Chhumkhum, Lungsen leh Tuichawnga khawchhung helna kawng – by-pass road siam mek an en a. Kawng siamna atana hman lung lakna hmun (quarry) bakah kawng siamnana hmanraw hman a that tawk leh that tawk loh endikna – Constructions & Project Quality Control Laboratory hmun an tlawh bawk.
Inspection Team chuan kawng luan hna thawh tawh chin chu tun dinhmunah chuan tha thawkhata an hriat thu sawiin, hna muang deuh lai nia an hriat leh ngaihpawimawh hmasak ngai lai chu fur tlak hmaa a theih anga chaka thawk turin thawktute an chah. Fur laia mipui chakkhai leh mamawh phurhna leh khualzin veivahna kawngah harsatna a awm lohnan Phairuangkai lei leh Tuichawng lei thawmthat dan tur ruahmanna an sawiho bawk.
NH-302 kawngpui zauh hna thawh mek hi Hrangchalkawn atanga Tlabung thleng niin, kawng hluiah chuan km. 96-a thui a ni a. Tuna kawng thar ruahman ang chuan km. 75.070-a thui tur niin, package hnihah then a ni. Package ‘A’ hi Hrangchalkawn atanga Chhumkhum thleng niin, km. 37.420-a thui a ni a; package ‘B’ hi Chhumkhum atanga Tlabung thleng niin, km. 37.650-a thui a ni.
NH-302 kawngpui zauh leh siamthat hna hi BRN Infrastructures Private Limited-in thawkin, tunah hian package A-ah 50% leh package B-ah 50% an zo tawh a. Kawng laih leh kawng luan bakah luikawr kanna tur lei dawh tur pali (major bridge 3 leh minor bridge 1) awmin, lei dawh hna hi thawh tan mek a ni.