Suma kan harsat chhan hi sawrkar inthlahdah vang – MBJP president

Suma kan harsat chhan hi
sawrkar inthlahdah vang
– MBJP president
Sawrkar laipuiin sum min ruahman sak chu Mizoram sawrkarin a ngaihsak tawk loh avang leh sum an hman thiam loh leh an hman dik loh avangin sumah kan harsat phah tih BJP State president Vanlalhmuaka chuan a sawi.
Zirtawpnia BJP Mizoram office-a inkhawmah Vanlalhmuaka chuan, 2025- 2026 Union Budget zirhona Aizawla neih rawn hmanpuitu Union minister of state for MSME & LESDE hoa an inkawmna atanga a lan danin Mizoram sawrkar chu buhzem bula tamchhawla let reng ang mai a ni tih a sawi. “Sawrkar laipuiin Mizoram tana sum a ruahman chu Mizoram sawrkarin a ngaihsak tawk loh avang leh sum an hman thiam loh leh an hman dik loh avanga Mizoramin sum lama harsatna tawk thin kan ni tih Union MoS-in kan tualchara min rawn hrilh ta mai hi, state sawrkar tan chuan hei aia mualphona hi a awm thei dawn em ni, tih theih a ni,” a ti.
Sum leh pai chungchanga state harsatna leh thla tin sum puk ngaia kan awm chhan chu eng dang vang niloin, sawrkar inthlahdah vangah a ngaih theih ta hial tih State BJP hruaitu hian a sawi a. Mipui hnena tax lak san a, mipui hrek zawnga kal thiam tura ngaihtuahna siam thiam a ngai hle ah a ngai tih a sawi.
AAI-in Union Budget tharah India rama airport thar siam belh tur 21 an neih lai a, state sawrkar hruaitu lu berten AAI-in sum an neih loh vang leh a hlawkpui loh vanga airport lak belh an duh loh thu, thubelhchian dawl lo tak mai mipui min hrilh chuan rilru a ti na hle tih a sawi. “Sawrkar laipuiin Lengpui Airport cheithat a, Lengpui Airport atanga air cargo hmanga Mizoram thar chhuah India ram mai nilo, khawvel ramdang thleng pawha thawn chhuah a nih dan tur Aizawlah ngei min rawn puansak lai a, kan state sawrkarin Indian Airforce kuta a hlan duh vanga India sawrkar hotute dawta an puh ta mai hi a pawi a, thudik tawklo sawi fo leh mahni thutiam tawh sawimawi leh sawimam tum phet hi tawngtai thinte tan sim thuai a ngai,” a ti.