Lungleiin CD ratio 71.69% nei

Lungleiin CD ratio 71.69% nei
Lunglei district-a bank awmten an hnen atanga mipuiin sum an dahluh atanga chhut a, loan hmang an pekchhuah chu za zelah 71.69 niin, tehfung atang chuan a tha thawkhat nia ngaih a ni.
Lunglei District Consultative Committee (DCC), District Level Review Committee (DLRC) leh District Level Security Committee (DLSC) chu additional DC Rochuangkimi Khenglawt hoin Thawhlehni khan an thukhawm a. Lead bank hotute bakah NABARD Lungleia hotute leh a kaihhnawih sawrkar department leh Sub-Hqrs YMA aiawh an tel.
2024 October atanga December (3rd quarter 2024-25) chhunga Lunglei district-a bank hrang hrang hnathawh thlirletin, hmachhawp an neih leh hmalak zui dan tur sawiho a ni.
Sawrkar laipui ruahmanna – PMJJBY leh PMSBY thlirho niin, heng scheme-ah hian hmasawnna hmuh a ni tih sawi a ni. PMJJBY leh PMSBY bika thla thum chhunga campaign kalpuiah Lunglei district-a target khaw 113-ah khaw 113 tuamchhuah niin, PMJJBY-ah target 847-ah 1424 (168.12%) leh PMSBY-ah target 909-ah 1796 (197.58%) inziaklut an awm.
Lunglei district-ah 3rd quarter 2024- 2025 chhung hian bank-ten credit deposit ratio 71.69% an nei tih tarlan a ni a. Lunglei district-a bank-ten loan an pek chhuah dan tur, Annual Credit Plan (ACP) ruahman atangin bank-te hian priority sector-ah 60% leh non-priority sector ah 110.25% loan an pe chhuak a. Self help group 43 hnenah cheng nuai 85.5 loan pek chhuah niin, KCC hnuaiah crop loan cheng nuai 2016.37, Animal Husbandary loan nuai 1295.85 leh fishery loan nuai 4.67 pek a nih bakah mi 47 hnenah PMEGP loan nuai 181.15 pek chhuah a ni tih sawi a ni.
Thutkhawmah hian bank sum vawnhim (security) lam leh sum lengvel (currency management & remittance) chungchang sawiho niin, bank zawng zawnga awm ngei ngei tur security guard, CCTV, fire extinguisher leh security alarm chu ngaihpawimawh nise, tih a ni.