MAHCO hnuaiah puantaha eizawng mi 25134 inziaklut

Mizoram Apex Handloom & Handicraft Cooperative Society (MAHCO) Ltd. hnuaiah cooperative society 96 an awm a, Mizoramah puantaha eizawng mi 25134 an inziaklut.
MAHCO hian Zirtawpni khan annual general assembly vawi 47-na an hmang a. Hmanpuitu Comerce & Industries minister F Rodingliana chuan, India ram hmun hrang hrangah cooperative society-te dinhmun a pawimawhin Mizoramah pawh kawng tam taka state intodelhna tura ban pawimawh tak an ni tih a sawi a. Mizo puantah leh thiamhnang hmanga siam chhuah thil chu hnam dang pawhin an hlutpui hle thin tih sawiin, kan hnam hmel tilangtu leh hnam rohlu vawnthatna pawimawh tak pawh a ni tih a sawi a ni.
“Sawrkar laipuiin ruahmanna changtlung tak nen handloom industry tihhmasawn dan tur ruahmanna a siam a. Mizoram pawhin chumi hlawhtlinna chu hmu chhoh zel kan inbeisei a ni,” a ti.
Cooperative Societies registrar John LT Sanga pawhin handloom industry chu mi tam tak eizawnna siamsaktu a nih angin, sawrkarin a ngaipawimawh hle tih a sawi a. Computerisation of RCS office hmalakna hnuaiah primary society-ten dilna an thlen thin pawh district cooperative officer-te kaihhruaiin, online veka kalpui tawh tur a ni a, tunhnai maiah PACS 24 hnenah computer set leh a kaihhnawih thil pawimawh pek chhuah a ni tih a sawi.
MAHCO hi kum 1977 khan din a ni a, tunah MAHCO hnuaiah hian cooperative society 96 an awm mek. Mizoramah hian puantaha eizawng mi 25134 an awma ngaih a ni a. RCS hnuaiah pawh handloom & handicraft primary society 180 vel awmin, heng zinga zaa 53 vel chu MAHCO hnuaiah hian an inziaklut.