Neurosurgery Unit din kan tum mek – Health minister

Neurosurgery Unit din kan tum mek
– Health minister
Neurosurgery Unit din turin an department-in rawtna an siamfel tawh tih Health minister Lalrinpuii chuan a sawi.
Indian Oil Corporation Limited-in corporate social responsibility kaltlanga Zoram Medical College & Hospital-a damlo na zual enkawlna tur khawl changkang (critical care equipment) leh advanced life support ambulance an pek chu Zirtawpni khan Health & Family Welfare ministerhian a hlan a. IOC Ltd-in Mizoram healthcare service hmasawn zelna atan Rs. 62,38,548 hu (C-arm machine, Diathermy Machine leh advanced life support ambulance) hmanga an puihna chu khawtlang hriselna leh damlote himna an ngaihpawimawh zia tilangtu a ni tih a sawi.
Mizoram-in neurosurgery lamah hmasawnna tur an la ngah hle tih sawiin, damlo neurosurgical care lam mamawh chuan loh theih lohna avangin state pawn lama inenkawlna an zawn a ngai thin a. Hei vang hian Neurosurgery Unit dinna tur proposal siamfel tawhin, hemi atana khawl bungrua an la mamawh pawh IOC Ltd chu nakin zel atan pawh thawhpuiah a sawm nghal tih a sawi a ni.
IOCL chief manager (HR-CSR) Malati Malakar chuan India hmarchhak state-te an ngaihpawimawh a. Sawkar danin CSR hnuaia corporation-te a phut thin – an hlawkna tel (profit) atanga za zela pahnih khawtlang hmasawnna atana hman tur aia tam an pechhuak thin tih a sawi.
Tuna an thil hlan C-arm machine hian orthopaedics (ruh), general surgery, urology leh Trauma Care lamah puiin, diathermy machine hian surgery him zawk neihna kawngah nasa takin a pui thei dawn a, advanced life support ambulance hian damlo dinhmun hlauhawma dingte him leh rang zawka phurhna leh ambulance chhunga treatment pek theihna kawngah a pui thei dawn tih a sawi a ni.