Nu leh pa thenkhat mahni fate enkawl thei lo an awm thin chu pawi a tih thu Social Welfare minister Er Lalrinawma chuan a sawi a. Naupang kumtling lo chunga mawi lo taka che thinte a dem tih a sawi.
Social Welfare & Tribal Affairs minister hian June 23 khan Mizoram State Commission for Protection of Child Rights (MSCPCR) office tlawhin thawktute nen an inkawm a. Naupangte dikna chanvo leh humhim kawnga thawktute chu fakawm tiin, dan hnuaiah dik taka hma lak zel chuan naupang chunga hleilenna awm thin chu a tlem phah zel a beisei tih a sawi.
Naupangte dikna leh chanvo humhim chu mitinte mawhphurna a ni a, nu leh pa thenkhat mahni fate pawh enkawl thei lo an awm thin chu a pawi tih a sawi a. Naupang kumtlinglo leh rilru thianghlim tak chunga mawilo taka thil ti thinte a dem tih a sawi. “Pathian thuin naupangte chunga ngilnei tura min zirtir angin, nu leh paten kan fate himna theuh kan ngaihpawimawh hi thil tul tak a ni,” a ti. Social media hman dan chungchangah pawh nungchang mawi leh inzirtir tam a tul tih sawiin, thawktute an mamawh an thlente a theih anga hma lakpui zel a tum tih a sawi a ni.
MSCPR member Dr Julie Remsangpui Fambawl chuan an hmalakna leh hmachhawp a sawifiah a. MSCPR chu naupangte himna turin kum 2018 khan din a ni a, naupangte himna kawnga an dikna chanvo an hmuh theihna tura an beih dan leh an hmachhawp te sawiin, hostel, jail leh hmundangte an tlawh thin thu a sawi. Naupangten harsatna an tawh changin Mizoram State Commission for Protection of Child Rights hi helpline no. 6009888804 ah a biakpawh theih tih pawh sawi a ni bawk.
Mahni fate enkawl thei lo an awm thin hi a pawi – SW minister
Get real time updates directly on you device, subscribe now.