Sawrkar tha siam turin Congress a belh tlak – Lalrindika Ralte

Sawrkar tha siam turin Congress chu party belh tlak a ni tih Congress MLA Lalrindika Ralte chuan a sawi.
MPCC Campaign Committee kaihhruaina in Inrinni zing khan Aizawl Chanmari Bazar bulah a thawh thumna atan Congress Thalai Hqrs. chuan ‘That loh theih lohna sawrkar tha, kalphung dik siam tura hmalakna beihpui’ street campaign an nei a. Thusawitu Lalrindika Ralte chuan Pathianin kan tan liau liaua min pek Mizoram chu a chhunga mipuiin kan tichhe tur a ni loa, a thatna turin theihtawp chhuaha kan beih bakah humhim tlat chu mitin mawhphurhna a ni, tiin, “Chumi tur chuan mipui pawhin theihtawp kan chhuah a, sawrkar tha siam thei tura party belh tlak, hruaitu dik leh rinawm, sawrkar tha siam tura kalphung dik leh diklo lai hrechiangtu Pu Lalsawta leh a kaihhruai party hi kan tihtlin a ngai,” a ti.
MPCC treasurer Dr Lalmalsawma Nghaka chuan Congress sawrkar kalta in thiltha tam tak a ti a, hmuntin ramtinah hmasawnna nasa takin a thlen tih a sawi. Chutihrualin, tihfuh tawk lo leh tha lo lai a awm tih erawh hai rual a ni lo, tiin, “Pu Lalsawta hoin tih fuh tawk lohte chhuiletin, a tha lo lai siamtha a, a tha thei ang bera ram leh hnamin hma a sawnna tura theihtawp chhuah hi Congress party tum a ni a. Tang puihna hmanga thawkrim leh mi taimate dinchhuahna ramah Zoram hi siam a, mipui huapzo sawrkar, mi nawlpui tana innghahna leh thlamuanpui tham sawrkar tha leh kalphung dik kan siam dawn a ni,” a ti.