Mahni kea din tumte khai chhuah tum dan an bangbo – Dr Vanlalthlana

Sawrkar mekten mahni kea din tumte khaichhuah an tum danah an bangbo hle tih MLA Dr Vanlalthlana chuan a sawi.
ZPM party chuan Inrinni zing khan Aizawl khawpui hmun hrang hrang – Chanmari kawn, Dawrpui, Salem Veng leh Maubawkah street campaign an nei a. Heta thu sawitu MLA Dr Vanlalthlana chuan tuna sawrkarna chelhtuten thalai, mahni kea din tumte khaichhuah an tum danah sawi ngaihna pawh awm lo khawpin an bangbo a, policy chu nei ve bawk mah se, a taka tihhlawhtlin hi a pawimawh lai a ni, tiin a sawi.
ZPM an sawrkar chuan entrepreneurship lama a ngaihna hria leh helama thiam an awm a, thalai, mahni kea dinchhuah tumte tan thapui an thawh dawn tih a sawi.
“India rama kawng nei chhe ber, zirna lam pawh nei chhe ber, power-ah nise intodelh ni awm thei bawk si lo hi a mak a; eng hi nge ram hnuk leh hmasawnna tak tak sawrkarna siam tawhte hian an tih, tih hi kan inzawt a. Engvangin nge mipuiin kan mamawh ngawih ngawih hi kan neih theih loh a, state dang nen khaikhin rala a hniam pawl kan nih bik ziah; rual kan awh zia leh mipui nat ziate, mipui nat ruala na ve thin ram hruaitu kan neih hunah hmasawnna leh danglamna kan hmu ang,” Dr Vanlalthlana hian a ti.
Ram hmasawnna leh ruhrel lian siamna tur SASCI chu sawrkar laiin party inhlawhna’n an hmang mai mai a nih chuan, ram hruaitute hian insawifiahna tur an la nei dawn tih a sawi a. “Kan thalaite an harhthar a, politics an ngaihven nasa tawh hle a ni,” a ti bawk.