Mahni kutkawih ngeia billionaire ni thei naupang ber
Mahni kutkawih ngeia billionaire ni thei naupang ber
Artificial Intelligence (AI)-ah khawvel a thang chak hle a, tunlaia eizawnna hlawk leh hna hmuh theihna kawng inhawng zau ber a ni mek a, AI lama thiamna nei ten sum an rut ta tawk tawk zel mai a, tunah chuan thian pathum, kum 22 mi vek te chu AI avangin billionaire an ni ta a, mahni kutkawih ngeia billionaire ni thei naupang ber an ni. Heng thian pathum zinga pahnih chu Indian an ni a, pakhat chu American a ni.
Brendan Foody, Asarsh Hiremath leh Surya Midha te an ni a, an pathum hian San Francisco a hmunpui nei, AI recruiting platform Mercor an din a, kar kalta mai khan an company hian dollar maktaduai 350 funding an hmu a, tunah chuan an firm hlutna hi dollar tluklehdingawn 10 a tling ta a, tihian, an pathumin, kum 22 mi chauh niin, billionaire an ni ta a ni.
A hmaa mahni kutkawih ngeia billionaire ni thei naupang ber chu Mark Zuckerberg niin, ani hi kum 23-ah billionaire a ni thei a, Zuckerberg-a record hi an rawn khum ta a ni.
An firm hlutna hi dollar tluklehdingawn 10 a nih takah chuan an pathum hian share 22% an nei a, chumi hlut zawng chu dollar tluklehdingawn 2 chuang a ni. Foody hi an company CEO niin, Hiremath hi CTP a ni a, Midha hi board chairman a ni ve thung. Hiremath hi a nu leh pate chu Karnataka atanga US-a pem lut an ni a, Midha pawh a chhungte hi Delhi atanga US-a pem an ni.
An pathum hian mipa hlang kalna Jesuit school, Bellarmine College Preparatory, San Jose atanga inchhar an ni a, national debate tournament-a tel tura an inbuatsaihna lamah zanrei tawh lamah an intawng a, an inkawmngeih chhunzawm ta zel a ni.
High school an zawh hnuah university tha tak takah an kal darh a, Foody hian Georgetown-ah economics a zir a, Hiremath hian Harvard-ah computer science zirin, Midha hian Georgetown-ah foreign service a zir ve thung a, Silicon Valley-ah start-up thliin a len khawm leh ta a ni.
2023 kum bul lam khan Mercor hi an din a, a tirah an tum dan chuan India-a software engineer thiam tak tak ten US-a hna an hmuh theih nan online-a hna an zawnna kawngah tanpuitu nih an tum a, mahse, a beisei leh rin phak bakin an thang a, AI chhawr tangkaiin, tunah chuan khawvel hmun hrang hrangah specialist 30,000 chuang an nei tawh a, law, medicine, finance leh engineering thlengin an huam vek tawh a, an client zinga chuan OpenAI, Anthropic, Google DeepMind bakah “Magnificient Seven” tech giant an tih zinga paruk te pawh an tel a, 2035-ah chuan Mercor hi khawvel huapa hna zawnna lian nih an tum tawh a ni.
An company hi 2024 kum laihawl vel khan an rawn thang duang deuh thut a, dollar maktaduai 500 annual revenue an nei thei a, a kum hmasaah chuan dollar maktaduai 100 an tlin ngawr ngawr chauh a ni. 2024 atang hian funding lamah tan an la a, February 2025-ah chuan an company hlutna hi dollar tluklehdingawn 2 a tling der tawh a, Silicon Valley-a start-up thang duang ber tiin an sawi hial a ni.